សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នៅថ្ងៃទី២១ ខែធ្នូ ឆ្នាំ២០២២នេះ លោកវរសេនីយ៍ទោ ជាង ហុកសែ អធិការរងនគរបាលខណ្ឌដង្កោទទួលបន្ទុកផែនព្រហ្មទណ្ឌបានឱ្យដឹងថា កម្លាំងជំនាញបានឃាត់ខ្លួនជនសង្ស័យម្នាក់ក្នុងចំណោមបក្ខពួក៣នាក់ពាក់ព័ន្ធករណីធ្វេីសកម្មភាពកាប់ប្លន់យកម៉ូតូមួយគ្រឿងពីគូសង្សារមួយគូបានសម្រេច កាលពីថ្ងៃទី១៨ ខែតុលា ឆ្នាំ២០២២ វេលាម៉ោង២០និង៣០នាទី ត្រង់ចំណុចខាងមុខតូបលក់ខ្យង ផ្លូវជាតិលេខ៣ ស្ថិតក្នុងភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ ។
សមត្ថកិច្ចបានឱ្យដឹងទៀតថា ជនរងគ្រោះឈ្មោះ ប៉ាល់ ដាយដែន ភេទប្រុស អាយុ២៥ឆ្នាំ មុខរបរជាងរថយន្ត មានទីលំនៅភូមិដំណាក់ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។ ចំណែកជនសង្ស័យដែលឃាត់ខ្លួនបានមានឈ្មោះ ផល តារា ភេទប្រុស អាយុ២៧ឆ្នាំ មុខរបរមិនពិតប្រាកដ មានទីលំនៅភូមិក្រាំងស្វាយ សង្កាត់ក្រាំងពង្រ ខណ្ឌដង្កោ រាជធានីភ្នំពេញ (ជនសង្ស័យប្រើប្រាស់ថ្នាំញៀន)។
វត្ថុតាងចាប់យក ៖ ១-ម៉ូតូកញ្ចាស់មួយគ្រឿងម៉ាកស៊ុយហ្ស៊ុយគីនិច ពណ៌ទឹកប្រាក់, ២-កាំបិតផ្គាក់ដងដែកប្រវែង៥០សង់ទីម៉ែត្រចំនួន០១។
សមត្ថកិច្ចបានបញ្ជាក់ឱ្យដឹងថា កាលពីថ្ងៃទី១៨ ខែធ្នូ ឆ្នាំ២០២២ វេលាម៉ោង១៩និង០០នាទី ជនរងគ្រោះឈ្មោះ ប៉ាល់ ដាយដែន ភេទប្រុស បានជិះម៉ូតូម៉ាកស្គូពីអាយ ពណ៌ស សេ៊រីឆ្នាំ២០១៨ ពាក់ផ្លាកលេខកំពង់ធំ 1K-9967 មកជួបសង្សារនៅម្តុំវត្តស្លែង ផ្លូវជាតិលេខ៣ សង្កាត់ពងទឹក ខណ្ឌដង្កោ រាជធានីភ្នំពេញ ហើយក៏បានឌុបសង្សារទៅអង្គុយលេងនៅតូបលក់ខ្យង ស្ថិតនៅភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នពេញ ពេលទៅដល់ក៏បានទុកម៉ូតូម៉ាកខាងលើនៅខាងមុខតូបរួចក៏បាននាំគ្នាអង្គុយជជែកគ្នាលេង ។ លុះដល់វេលាម៉ោង២០និង៣០នាទីថ្ងៃខែឆ្នាំដដែល ស្រាប់តែមានជនសង្ស័យចំនួន០៣នាក់ ទី១-ឈ្មោះ ផល តារា ភេទប្រុស និងជនសង្ស័យ២នាក់ទៀត បានជិះម៉ូតូម៉ាកស៊ូយហ្ស៊ុយគីនិច ពណ៌ទឹកប្រាក់ (ម៉ូតូកញ្ចាស់)មកឈប់ពីមុខតូលក់ខ្យងក្បែរម៉ូតូរបស់ជនរងគ្រោះ ហើយជនសង្ស័យឈ្មោះ ដោក ធីម ក៏បានចុះពីលើម៉ូតូដៃកាន់កាំបិតផ្គាក់ប្រវែង៥០សង់ទីម៉ែត្រដើរចូលមកកាប់ជនរងគ្រោះចំចង្កេះខាងឆ្វេងរងរបួសស្រាល ហើយជនសង្ស័យក៏បានបោះកាំបិតចោលរួចរត់ទៅយកម៉ូតូម៉ាកខាងលើរបស់ជនរងគ្រោះជិះគេចខ្លួនបាត់ទៅ។
បន្ទាប់មក ជនរងគ្រោះក៏បានមករាយការណ៍ប្រាប់សមត្ថកិច្ចនិងដាក់ពាក្យបណ្តឹងនៅប៉ុស្តិ៍នគរបាលរដ្ឋបាលក្រាំងពង្រដើម្បីឱ្យសមត្ថកិច្ចជួយធ្វើអន្តរាគមន៍ស្រាវជ្រាវរហូតឃាត់ខ្លួនជនសង្ស័យខាងលើបានយកមកចាត់ការតាមផ្លូវច្បាប់ ។ រហូតដល់ថ្ងៃទី២០ខែធ្នូ ឆ្នាំ២០២២ វេលាម៉ោង១៥និង០០នាទី សមត្ថកិច្ចក៏បានធ្វើការស្រាវជ្រាវឃាត់ខ្លួនជនសង្ស័យបានម្នាក់ឈ្មោះ ផល តារា រួមនិងវត្ថុតាងម៉ូតូម៉ាកស៊ុយហ្ស៊ុយគីនិច ពណ៌ទឹកប្រាក់ (ម៉ូតូកញ្ចាស់) យកមកធ្វើការសាកសួរនៅអធិការដ្ឋាននគរបាលខណ្ឌដង្កោដើម្បីចាត់ការតាមនីតិវិធីច្បាប់តែម្តង។ ចំណែកជនសង្ស័យជាបក្ខពួកចំនួន០២នាក់ទៀតកំពុងតែរត់គេចខ្លួន តែសមត្ថកិច្ចបានកំណត់អត្តសញ្ញាណរួចហើយ កំពុងតែស្រាវជ្រាវចាប់ឃាត់ខ្លួននៅពេលក្រោយ ៕
ដោយ ៖ ភារ៉ា ដង្កោ
