សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ លោក អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ ប្រេីធម៌ក្ដៅចំពោះអំពេីរំលោភបំពានច្បាប់របស់ឧកញ៉ា កូ ណៃ ករណីចុះបង្ក្រាបអំពើរំលោភបំពានដីរដ្ឋ។ ដែលប្រតិបត្តិការនេះបានធ្វើឡើងកាលនៅថ្ងៃទី ២៣ ខែ ធ្នូ ឆ្នាំ ២០២២ គឺ លោក អ៊ុំ រាត្រី អភិបាល ខេត្តបន្ទាយមានជ័យ បានដឹកនាំកងកម្លាំងនិងមន្ត្រី ចុះបង្ក្រាបអំពើរំលោភបំពានដីរដ្ឋពីសំណាក់លោកឧកញ៉ា កូ ណៃ ថៅកែវ៉ៃថ្មប្រចាំខេត្តបន្ទាយមានជ័យ នៅចំណុចភូមិ ពង្រ សង្កាត់កំពង់ស្វាយ ក្រុង សិរីសោភ័ណ ខេត្ត បន្ទាយមានជ័យ ។
សូមជម្រាបជូនថា, អ្វីដែលធ្វើឲ្យមហាជនហួសចិត្តនោះគឺ ឧកញ៉ា កូ ណៃ ដែលរំលោភបំពានយកដីរដ្ឋនោះ បានយកថ្មធំៗមកបិទផ្លូវមិនឱ្យប្រជាពលរដ្ឋធ្វេីដំណើរឆ្លងកាត់ ។ បន្ទាប់ពីទទួលបានដំណឹងនេះ លោក អភិបាលខេត្ត បន្ទាយមានជ័យ ចុះបង្ក្រាបផ្ទាល់តែម្ដង ដោយរុះរេីរបង និង ថ្មចេញពីដីរដ្ឋ ។ នេះបើតាមការបញ្ជាក់ពីបងប្អូនប្រជាពលរដ្ឋ ប៉ុន្តែគេមិនទាន់បានទទួលនូវរបាយការណ៍ ជុំវិញការចុះបង្ក្រាបនេះ ចាប់យកបានវត្ថុតាងអ្វីខ្លះ ឬក៏ត្រូវបានអាជ្ញាធរខេត្ត និងបន្តនីតិវិធីតាមផ្លូវច្បាប់ ដើម្បីចាត់វិធានការលើជនដែលបានរំលោភយកដីរដ្ឋ ។
តាមប្រជាពលរដ្ឋខេត្តបន្ទាយមានជ័យប្រាប់ឱ្យដឹងថា ឧកញ៉ា កូ ណៃ នេះ មានក្របខ័ណ្ឌនៅ ក្រសួងមហាផ្ទៃ រកស៊ីខាងវ៉ៃថ្ម តែមានបទពិសោធន៍ច្រើនខាងរំលោភដីរដ្ឋយកមកធ្វេីកម្មសិទ្ធិរបស់ខ្លួន សូម្បីតែនៅស្រុកស្វាយចេក ក៏លោកឧកញ៉ានេះរំលោភបំពានដែរ ។ ដូច្នេះទាំងមន្ត្រីនគរបាលយុត្តិធម៌ ទាំងមន្ត្រីជំនាញភូមិបាល អាជ្ញាធរគ្រប់ជាន់ថ្នាក់ បើកការស៊ើបអង្កេត រកឲ្យឃើញជុំវិញបទល្មើសនេះ ដើម្បីការពារឲ្យផលប្រយោជន៍របស់រដ្ឋ និងការពារដីឯកជនរបស់ប្រជាពលរដ្ឋ។
ប្រជាពលរដ្ឋសូមសំណូមពរដល់ អភិបាលខេត្តបន្ទាយមានជ័យ មេត្តាចុះពិនិត្យមេីលសកម្មភាពរបស់ ឧកញ៉ា កូ ណៃ នៅ ភូមិ ស្លក្រាម ស្រុក ស្វាយចេក ខេត្តបន្ទាយមានជ័យជាបន្តទៀតផង សូមអរគុណទុកជាមុន ។ ខណៈទទួលដំណឹងថា មានករណីកាយដីចំណីភ្នំ ដីឯកជន ដោយក្រុមអ្នកមានអំណាច មានលុយ ហ៊ានធ្វើបំពានទៅនឹងច្បាប់។ ពាក់ព័ន្ធក្នុងករណីនេះ អង្គភាពមជ្ឈមណ្ឌលព័ត៌មាន ” នគរវត្ត” មិនអាចធ្វើការទំនាក់ទំនងបានទេពីលោកឧកញ៉ា កូ ណៃ នៅរសៀលថ្ងៃទី២៥ ខែធ្នូ ឆ្នាំ២០២២ ថាតើករណីនេះ ពិតជាបានពាក់ព័ន្ធជាមួយគាត់ឬមួយយ៉ាងណា ? អង្គភាពយើងខ្ញុំនឹងរង់ចាំការទទួល នូវអ្វីដែលធ្វើការបកស្រាយមានមូលដ្ឋានជាក់លាក់ គ្រប់ម៉ោងធ្វើការ ៕
ដោយ ៖ សហការី
