លោក ឃួង ស្រេង ៖ ណែនាំឱ្យបន្ថែមកម្លាំងទប់ទឹកនៅតាមសណ្តរស្ទឹងព្រែកត្នោត និងតម្រូវឱ្យផ្អាកការធ្វេីចរាចរណ៍សម្រាប់រថយន្តធុនធំផ្លូវលេខ២០អា

ចែករំលែក៖

ភ្នំពេញ៖ កំណាត់ផ្លូវលេខ២០អា ត្រូវបានអាជ្ញាធររាជធានីភ្នំពេញសម្រេបិទផ្លួវបណ្តោះអាសន្ន មិនឱ្យរថយន្តធុនធំធ្វើចរាចរណ៍ឆ្លងកាត់នោះទេ ខណៈកម្រិតទឹកស្ទឹងព្រែកត្នោតបានហក់ឡើងបណ្ដាលឲ្យជន់លិចលំនៅឋានប្រជាពលរដ្ឋមួយចំនួនធំមានទទួលរងលិចលង់ រហូតត្រូវចាកចេញមករកទីទួលសុវត្ថិភាព ប្រក់តង់ស្នាក់នៅជាបណ្ដោះអាសន្ន។

ដើម្បីទប់ស្កាត់នូវគ្រោះអាក្រក់នេះលោក ឃួង ស្រេង អភិបាលរាជធានីភ្នំពេញនារសៀលថ្ងៃទី១៥ខែមករាឆ្នាំ២០២៣នេះ បានដឹកនាំមន្ត្រីជំនាញចុះពិនិត្យស្ថានភាពជាក់ស្ដែងនៅតាមទីតាំងដែលទឹកជំនន់ទឹកភ្លៀងបានហូរចូលលំនៅឋានបងប្អូនប្រជាពលរដ្ឋក្នុងខណ្ឌដង្កោ។

លោក ឃួង ស្រេង ណែនាំឱ្យបន្ថែមកម្លាំងទប់ទឹកនៅតាមសណ្តរស្ទឹងព្រែកត្នោត និងតម្រូវឱ្យផ្អាកការធ្វេីចរាចរណ៍បណ្តោះអាសន្តរថយន្តធុនធំផ្លូវមុខសាលាសង្កាត់គងនយ។

លោក ឃួង ស្រេង អភិបាលរាជធានីភ្នំពេញ បានណែនាំឱ្យ មន្រ្តីក្រសួងធនធានទឹកនិងឧតុនិយម ព្រមទាំងអាជ្ញាធរខណ្ឌដង្កោ រួមទាំងកម្លាំនគរបាលខណ្ឌ កងរាជអាវុធហត្ថខណ្ឌ ព្រមទាំងកងកម្លាំងប្រដាប់អាវុធនានាបានប្រចាំការតាមដានស្ថានភាពទឹកជាប់ជាប្រចាំ ។មិនតែប៉ុណ្ណោះបានច្រកដីខ្សាច់ទប់ទឹកដែលកំពុងហៀរចេញពីស្ទឹងមកលើផ្លូវប្របមាត់ស្ទឹង ហើយបើគ្មានការទប់ទេនោះទឹកនិងហូរ ផ្ដាច់ផ្លូវលិចតំបន់ក្នុងសណ្ដរស្ទឹង ព្រមទាំងគំរាមកំហែងដល់ផ្លូវទំនប់សណ្ដរស្ទឹងមិនខានឡើយ។

បើតាមប្រជាពលរដ្ឋបាននិយាយថា ទឹកបានចាប់ផ្ដើមឡើងខ្លាំងនៅថ្ងៃទី១២ ខែមករា ប៉ុន្តែមិនបានឡើងពេញប្រៀបស្ទឹងភ្លាមៗនោះឡើយ រហូតមកដល់វេលាយប់រំលងអធ្រាត្រឈានចូលថ្ងៃទី១៤ ខែមករា ស្រាប់តែឡើងយ៉ាងគំហុកពេញច្រាំងនិងហៀរចូលលិចលំនៅឋានពួកគាត់យ៉ាងឆាប់រហ័ស។

លោក ម៉ៅ ប៊ុនធឿន ប្រធានមន្ទីរធនធានទឹក និងឧតុនិយមរាជធានីភ្នំពេញបានឱ្យដឹងថា ស្ថានភាពជំនន់នៅកំពង់ស្ពឺបានស្រកហេីយ ចឹងរាជធានីភ្នំពេញ អាចស្រកនៅល្ងាចនេះឬស្អែក ដែលទឹកមិនអាចគម្រាមកំហែងរាជធានីភ្នំពេញបានឡេីយ។

លោកឃួង ស្រេង បានណែនាំឱ្យមន្ត្រីជំនាញ ខិតខំយកចិត្តទុកដាក់ និងតាមដានឱ្យបានជាប់ជាប្រចាំ ជាពិសេសត្រូវបន្ថែមកំលាំងរួមជាមួយបាវ និងខ្សាច់ សម្រុកទប់ឱ្យបានកុំឱ្យមានទឹកហូរចេញយប់នេះ ព្រោះថា បេីទប់យប់នេះបាននឹងមិនមានលិចឡេីយដោយហេតុថា ជំនន់ទឹកភ្លៀងនៅកំពង់ស្ពឺបានចាប់ផ្តេីមស្រកហេីយ។

លោក ឃួង ស្រេង ក៏បានណែនាំឱ្យសមត្ថកិច្ចជំនាញ សហការជាមួយខេត្តកណ្ដាល ឱ្យផ្អាកការធ្វេីចរាចរណ៍ឡានធំនៅផ្លូវលេខ២០អា ឬផ្លូវមុខសាលាសង្កាត់គងនយជាបណ្តោះអាសន្នរថយន្តធុនធំផងដែរ។

សូមបញ្ជាក់ថា៖ បើតាមអាជ្ញាធរ គ្រោះធម្មជាតិនេះបានធ្វើឱ្យផ្ទះប្រជាពលរដ្ឋ ជាង១ពាន់ខ្នងផ្ទះមាន២៥ភូមិ ស្មេីនឹង១០សង្កាត់នៅខណ្ឌដង្កោ រាជធានីភ្នំពេញ ត្រូវចាកចេញឡើងគោករកកន្លែងសុវត្ថិភាព ដោយសង់ខ្ទមប្រក់តង់ស្នាក់នៅបណ្ដោះអាសន្ន៕