សារព័ត៌មាន នគរវត្ត តែងតែនាំមុខគេជានិច្ច
អ្នកចាំទីរបស់ Tottenham និងប្រធានក្រុម Hugo Lloris ត្រូវបានអវត្តមានពី៦ទៅ៨សប្តាហ៍ដោយសាររបួសជង្គង់។ អតីតប្រធានក្រុមជម្រើសជាតិបារាំងវ័យ៣៦ឆ្នាំរូបនេះបានរងរបួសសរសៃពួរក្នុងការទទួលជ័យជម្នះ ១-០ របស់ Spurs លើក្រុម Manchester City ក្នុងក្របខ័ណ្ឌ Premier League កាលពីថ្ងៃអាទិត្យ។
បច្ចុប្បន្ន Spurs មានអតីតកីឡាករ Southampton និងអង់គ្លេស Fraser Forster សម្រាប់បម្រុងដែលជាដៃទី២។ កីឡាករ Academy Brandon Austin និង Alfie Whiteman គឺជាជម្រើសផ្សេងទៀត ប៉ុន្តែអ្នកទាំង២មិនមានបទពិសោធន៍ជាន់ខ្ពស់ច្រើនទេ។
បច្ចុប្បន្ន Spurs ឈរនៅលេខរៀងទី៥ក្នុង Premier League ហើយកំពុងប្រជែងដណ្តើមយកកៅអី Champions League សម្រាប់រដូវកាលក្រោយ។
ក្រុមមាន់ខ្នាយមាស Tottenham នឹងត្រូវប្រកួតជាមួយក្រុម Leicester City ក្នុងលីកនៅថ្ងៃសៅរ៍ មុនពេលធ្វើដំណើរទៅជួបក្រុម AC Milan សម្រាប់ការប្រកួតជើងទី១វគ្គ១៦ក្រុមក្នុងក្របខ័ណ្ឌ Champions League នៅថ្ងៃអង្គារ។
អ្នកចាំទី Forster ដែលបានចូលរួមជាមួយការផ្ទេរដោយមិនមានតម្លៃខ្លួនកាលពីរដូវក្តៅមុន បានបង្ហាញខ្លួននៅ Premier League តែមួយដងសម្រាប់ Spurs ពោលគឺស្មើ ២–២ ក្នុងថ្ងៃប្រកួត Boxing Day ជាមួយ Brentford ។
អ្នកចាំទី Lloris ដែលជាប្រធានក្រុមបានជ័យជំនះឲ្យបារាំងឈ្នះ World Cup 2018 បានប្រកាសចូលនិវត្តន៍ពីបាល់ទាត់អន្តរជាតិកាលពីខែមុន។ គាត់បានរក្សាសំណាញ់ទី (Clean Sheet) ចំនួន៧ដងពីការប្រកួតលីកចំនួន២១នៅរដូវកាលនេះ ៕
ដោយ៖ ភារៈ(រូបភាព ៖ BBC Sport)
