🔴សូមអាជ្ញាធរខេត្តកំពង់ស្ពឺជួយមើលផង! ក្រុមអាជីវករប្រមាណជា២០០តូបក្នុងផ្សារកំពង់ស្ពឺបាននាំគ្នាយកបន្លែត្រីសាច់មកដាក់លក់លើផ្លូវសាធារណៈបង្កឱ្យកកស្ទះ

ខេត្តកំពង់ស្ពឺ៖ បងប្អូនប្រជាពលរដ្ឋបានសំណូមពរសូមឱ្យអាជ្ញាធរនិងគណៈកម្មការផ្សារកំពង់ស្ពឺជួយពិនិត្យមើលបងប្អូនក្រុមអាជីវករលក់បន្លែត្រីសាច់លើផ្លូវសាធារណ:បង្កឱ្យកកស្ទះផ្លូវចូលទៅសាលាខេត្តកំពង់ស្ពឺ បន្ទាប់ពីពួកគាត់បាននាំគ្នាដាក់ពាក្យបណ្តឹងជាច្រើនដងហើយតែគ្មានដំណោះស្រាយ។

    រូបភាពទាំងនេះពលរដ្ឋបានផ្ញើមកជូនអង្គភាពយើងដើម្បីឱ្យជួយផ្សព្វផ្សាយនៅព្រឹកថ្ងៃទី១៣ខែកម្ភៈឆ្នាំ២០២៣ស្ថិតក្នុងភូមិពាណិជ្ជកម្ម សង្កាត់រកាធំ ក្រុងច្បារមន ខេត្តកំពង់ស្ពឺ។

    ប្រភពពីអាជីវករម្នាក់តំណាងឱ្យក្រុមអាជីវករចំនួន២៣១តូបមានឈ្មោះ ខៀវ ចាន់ឡា បាននិយាយថា ពួកគាត់បាននាំគ្នាធ្វើពាក្យបណ្តឹងស្នើសុំអាជ្ញាធរក្រុងច្បារមនឱ្យជួយរៀបចំការលក់ដូររបស់ក្រុមអាជីវកត្រង់ចំណុចរង្វង់មូលដើមលាភមុខផ្សារកំពង់ស្ពឺឱ្យទៅលក់នៅដីឈួនកម្សាន្តវិញ ព្រោះថាតាំងពីក្រុមអាជីវករកន្លែងលោកឈួនកម្សាន្តមកដាក់ត្រង់ចំណុចខាងលើនេះបានឱ្យពួកគាត់លក់ដូមិនដាច់សោះសព្វថ្ងៃហ្នឹង ណាមួយពួកគាត់សព្វថ្ងៃជំពាក់លុយធនាគារផងត្រូវបង់រាល់ខែ។ ព្រោះបងប្អូនអ្នកដើរទិញម្ហូបអាហារពួកគាត់លែងចូលផ្សារអស់ហើយដោយសារអ្នកលក់ដូរនៅខាងរង្វង់មូលមានលក់ដូរបន្លែត្រីសាច់គ្រុប់ប្រភេទ ណាមួយពួកគាត់មិនចាំបាច់ដើរទិញឈប់ម៉ូតូឬរថយន្តទិញបានទៅហើយ។

   គាត់បានបន្តទៀតថា បើសិនមានបងប្អូនណាមកឈប់ម៉ូតូពីមុខផ្សារដើចូលទៅទិញបន្លែត្រីសាច់ខាងក្នុងត្រូវសណ្តាប់ធ្នាប់ក្រុងចាប់យកម៉ូតូទៅសាលាក្រុងហើយ ដោយប្រើលេសថាបង្កឱ្យកកស្ទះទើបពួកគាត់សម្រេចចិត្តនាំគ្នាដាក់លក់ដូរលើផ្លូវសាធារណៈមុខផ្សារកំពង់ស្ពឺធ្វើឱ្យមានការកកស្ទះ ដើម្បីឱ្យអាជ្ញាធរក្រុងច្បារមនបានហៅពួកគាត់ទៅដោះស្រាយបណ្តឹងដែលពួកគាត់បានទាមទារ។

ក្រោមការលើកឡើងពីកង្វល់របស់ក្រុមអាជីវករចំនួន២៣១តូបក្រុមអ្នកយកព័ត៌មានបានទំនាក់ទំនងទៅលោក ទឹម ផានូ អភិបាលក្រុងច្បារមនដើម្បីសូមការបកស្រាយ លោកអភិបាលក្រុងបាននិយាយថា លោកបានឲ្យគណៈកម្មការផ្សារហៅបងប្អូនក្រុមអាជីវករទាំងអ្នកលក់នៅក្នុងផ្សារនឹងរង្វង់មូលមុខផ្សារមកសាលាក្រុងដើម្បីដោះស្រាយនៅរសៀលថ្ងៃទី១៣ខែកម្ភៈនេះហើយ លោកនឹងព្យាយាមសម្របសម្រួលពួកគាត់ឱ្យតូវគ្នាវិញ៕

ដោយ៖ចន្ទ លីហ្សា