សារព័ត៌មាន នគរវត្ត តែងតែនាំមុខគេជានិច្ច
ខ្សែប្រយុទ្ធ Neymar នឹងទទួលការវះកាត់ជួសជុលសរសៃចងកជើង ដែលនឹងធ្វើឱ្យកីឡាករអន្តរជាតិប្រេស៊ីលរូបនេះ អវត្តមានពេញមួយរដូវកាលនេះ។ នេះបើយោងតាមក្លិប Paris St Germain នៅ Ligue 1 បានប្រកាសកាលពីថ្ងៃអង្គារដើមសប្តាហ៍នេះ។
Neymar ដែលស៊ុតបាន១៣គ្រាប់ និង Assists ១១លើកនៅ Ligue 1 រដូវកាលនេះ មិនបានលេងចាប់តាំងពីការឈ្នះ ៤–៣ លើក្រុម Lille កាលពីខែមុន ដោយខកខានការប្រកួតពីរលើកចុងក្រោយរបស់ក្រុម PSG ។
ក្លិប PSG បានប្រកាសនៅក្នុងសេចក្តីថ្លែងការណ៍មួយថា “Neymar Jr មានបញ្ហានៅក្នុងកជើងខាងស្តាំរបស់គាត់ក្នុងរយៈពេលប៉ុន្មានឆ្នាំថ្មីៗនេះ។បន្ទាប់ពីរបួសដាច់សរសៃពួរចុងក្រោយរបស់គាត់បានគ្រាន់បើនៅថ្ងៃទី២០ ខែកុម្ភៈ បុគ្គលិកពេទ្យបានផ្តល់អនុសាសន៍ឱ្យធ្វើប្រតិបត្តិការជួសជុលសរសៃពួរដើម្បីជៀសវាងហានិភ័យធំនៃការកើតឡើងវិញ។ អ្នកជំនាញទាំងអស់ដែលបានពិគ្រោះបានបញ្ជាក់ពីភាពចាំបាច់នេះ។ ការពន្យារពេលពី៣ទៅ៤ខែត្រូវបានរំពឹងទុកមុនពេលគាត់ត្រលប់មកហ្វឹកហាត់វិញ” ។
ក្លិប PSG បានបន្ថែមថា គាត់នឹងទទួលការវះកាត់នៅ Doha។ លោក Christophe Galtier គ្រូបង្វឹករបស់ក្លឹបបាននិយាយថា អវត្តមានរបស់ Neymar នឹងក្លាយជាការបាត់បង់ដ៏ធំមួយ។
លោក Galtier បានប្រាប់អ្នកយកព័ត៌មានថា “គាត់គឺជាអ្នករកគ្រាប់បាល់បានច្រើនជាងគេ និងជាអ្នកបញ្ជូនបាល់ល្អនៅ Ligue 1 ដូច្នេះគាត់គឺជាការបាត់បង់ដ៏ធំមួយ។ បើគ្មាន Neymar ទេ យើងប្រហែលជាមានខ្សែបម្រើ២នាក់ និងខ្សែប្រយុទ្ធ៣នាក់ ឬខ្សែបម្រើ៣នាក់ និងខ្សែប្រយុទ្ធ២នាក់ ដោយមានកីឡាករដែលអាចចូលតាមពីក្រោយពីគ្រប់មុខតំណែងផ្សេងៗគ្នា”។
គួរបញ្ជាក់ថា ក្រុម PSG កំពុងឈរលើកំពូលតារាងដោយមាន៨ពិន្ទុលើក្រុមលេខ២ Olympique de Marseille។ ពួកគេត្រូវជួបជាមួយក្រុមBayern Munich នៅរាត្រីថ្ងៃពុធនេះ ក្នុងការប្រកួត Champions League វគ្គ១៦ក្រុមចុងក្រោយ ជើងទី២ ដែល PSG បានចាញ់ ១-០កាលពីប្រកួតជើងទី១ក្នុងទឹកដីខ្លួនឯង ៕
ដោយ៖ ភារៈ(រូបភាព ៖ Reuters/CNA)
