សារព័ត៌មាន នគរវត្ត តែងតែនាំមុខគេជានិច្ច
ទីភ្នាក់ងារសារព័ត៌មាន IRNA បានផ្សាយថា រដ្ឋមន្ត្រីក្រសួងយុត្តិធម៌អុីរ៉ង់ លោក Gholamhossein Mohseni Ejei បាននិយាយកាលពីថ្ងៃទី១៣ ខែមីនាថា ប្រទេសនេះបានផ្តល់ការលើកលែងទោសដល់មនុស្ស២២ពាន់នាក់ដែលត្រូវបានចាប់ខ្លួនក្នុងអំឡុងពេលតវ៉ាប្រឆាំងរដ្ឋាភិបាល។
រដ្ឋមន្ត្រី Ejei បាននិយាយថា “រហូតមកដល់ពេលនេះ មនុស្សប្រហែល 82.000 នាក់បានទទួលដីកាលើកលែងទោស រួមទាំង ២២ពាន់នាក់ដែលបានចូលរួមក្នុងការតវ៉ា” ។ រដ្ឋមន្ត្រីក្រសួងយុត្តិធម៌អុីរ៉ង់ មិនបានលម្អិតថា តើនៅពេលណាដែលការលើកលែងទោសត្រូវបានចេញ ឬអ្នកណានឹងមានសិទ្ធិទទួលបានការលើកលែងទោសនោះទេ។
នៅដើមខែកុម្ភៈ ក្នុងឱកាសខួបលើកទី 44 របស់អុីរ៉ង់នៃបដិវត្តន៍អ៊ិស្លាមឆ្នាំ 1979 មេដឹកនាំកំពូល Ayatollah Ali Khamenei បានបញ្ជាឱ្យលើកលែងទោសសម្រាប់អ្នកទោសរាប់ម៉ឺននាក់ រួមទាំងអ្នកដែលត្រូវបានចាប់ខ្លួនក្នុងអំឡុងពេលតវ៉ាប្រឆាំងរដ្ឋាភិបាល នេះបើយោងតាម IRNA ។
ការលើកលែងទោសនេះមិនអនុវត្តចំពោះជនជាតិពីរដែលត្រូវបានឃុំខ្លួននៅក្នុងប្រទេសអុីរ៉ង់នោះទេ។ IRNA បាននិយាយថា អ្នកដែលត្រូវបានចោទប្រកាន់ពីបទ “ពុករលួយ” ដែលជាការចោទប្រកាន់ប្រឆាំងនឹងបាតុករមួយចំនួនក៏មិនត្រូវបានផ្តល់ការលើកលែងទោសដែរ។
នាពេលថ្មីៗនេះ ប្រទេសមជ្ឈិមបូព៌ាមួយនេះបានប្រឈមមុខនឹងការតវ៉ាជាបន្តបន្ទាប់បន្ទាប់ពីការស្លាប់របស់ក្មេងស្រី Mahsa Amini ខណៈពេលដែលនៅក្នុងមន្ទីរឃុំឃាំងរបស់ប៉ូលិសនៅក្នុងខែកញ្ញា ឆ្នាំ 2022។
Amini ត្រូវប៉ូលិសចោទប្រកាន់ថាពាក់ក្រមាមិនសមរម្យ។
អាជ្ញាធរអុីរ៉ង់ក៏បានចាត់វិធានការខ្លាំងដើម្បីដោះស្រាយដែរ។ មនុស្សជាង២០.០០០នាក់ត្រូវបានចាប់ខ្លួនពាក់ព័ន្ធនឹងការតវ៉ា។ អាជ្ញាធរអុ៏រ៉ង់បានចោទប្រកាន់សត្រូវបរទេសពីបទញុះញង់ឱ្យមានការតវ៉ាទាំងនេះ៕ ដោយ៖ ធីរីណា
រូបថត៖ AP
