សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានការភ្ញាក់ផ្អើលដល់អ្នកភូមិ ហើយបានរាយការណ៍ទៅសមត្ថកិច្ចទាំងយប់ បន្ទាប់ពីមានអគ្គិភ័យបានឆាបឆេះតូបកាត់ដេរសម្លៀកបំពាក់មួយកន្លែង បណ្ដាលឱ្យខូចខាតទ្រព្យសម្បត្តិមួយចំនួននិងរបួសធ្ងន់ម្នាក់។
ហេតុការណ៍នេះបានកើតឡើងកាលពីវេលាម៉ោង៨និង២៥នាទីយប់ ថ្ងៃទី១៤ខែមីនាឆ្នាំ២០២៣ ស្ថិតនៅក្នុងភូមិស្វាយចេក ឃុំសំឡី ស្រុកកំពង់រោទ៍ ខេត្តស្វាយរៀង ។
យោងតាមសមត្ថកិច្ចនគរបាលស្រុកបានឱ្យដឹងថា ម្ចាស់ផ្ទះដែលរងរបួសធ្ងន់មានឈ្មោះ យូ សុផាត ភេទប្រុស អាយុ៣៦ឆ្នាំ មានទីលំនៅភូមិស្វាយចេក ឃុំសំឡី ស្រុកកំពង់រោទ៍ ខេត្តស្វាយរៀង ដោយរលាកដៃជើងនិងដងខ្លួនត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យ។
ប្រភពបន្តថា ចំពោះតូបកាត់ដេរដែល រងការខូចខាតមានទំហំ៣ម៉ែត្រគុណនឹង៤ម៉ែត្រសង់អំពីឈេី ដំបូលប្រក់ស័ង្កសី ខូចខាតប្រហែល១០% កំណាត់ខោអាវមួយចំនួន ម៉ាស៊ីនដេរចំនួន៣គ្រឿង និងរបស់របរមួយចំនួនទៀត។
តាមអ្នកភូមិបានឱ្យដឹងថា មុនកើតហេតុស្រាប់តែមានផ្សែងហុយចេញពីតូបកាត់ដេរបង្កជាអណ្ដាតភ្លើងទើបបង្កការភ្ញាក់ផ្អើលដល់ម្ចាស់តូបស្រែកហៅគ្នីគ្នាជួយពន្លត់និងធ្វើរបាយការណ៍ទៅសមត្ថកិច្ចមូលដ្ឋានមកធ្វើអន្តរាគមន៍ភ្លាមៗតែម្ដង។
សមត្ថកិច្ចបានបញ្ជាក់ពីមូលហេតុដោយសារតែម៉ាស៊ីនដេរឆ្លងចរន្តអគ្គិសនីទើបបណ្ដាលឲ្យឆាបឆេះបែបនេះ៕
ដោយ៖ សុថាន
