សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសជនជាតិបរទេសម្នាក់សង្ស័យស្រវឹងស្រាខ្លាំងបានបើករថយន្តម៉ាក TOYOTA AVANZA ក្នុងល្បឿនលឿនហើយជ្រុលទៅបុករថយន្តស៊េរីទំនើបម៉ាកLAND ROVER ដែលកំពុងឈប់ភ្លើងស្តុបពីក្រោយពេញទំហឹងបណ្ដាលឱ្យរងការខូចខាត។
ហេតុការណ៍នេះកើតឡើងកាលពីវេលាម៉ោង ១១និង៥៣នាទីយប់ថ្ងៃទី ២០ ខែមីនា ឆ្នាំ២០២៣ នៅត្រង់ចំណុចភ្លើងស្តុប(បេកាសេ)តាមបណ្ដោយផ្លូវព្រះមុនីវង្ស ស្ថិតក្នុងសង្កាត់ផ្សារថ្មីទី២ ខណ្ឌដូនពេញ រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនកើតហេតុគេឃើញរថយន្តស៊េរីទំនើបម៉ាកLAND ROVER មួយគ្រឿងពណ៌ខ្មៅ ពាក់ស្លាកលេខកម្ពុជាP-P-8989ធ្វើដំណើរតាមបណ្ដោយផ្លូវព្រះមុនីវង្សក្នុងទិសដៅពីត្បូងទៅជើង លុះពេលមកដល់ចំណុចកើតហេតុខាងលើបានឈប់ចាំភ្លើងស្តុប ពេលនោះក៏មានរថយន្តម៉ាក TOYOTA AVANZA មួយគ្រឿង ពណ៌ស ពាក់ស្លាកលេខភ្នំពេញ2AN-9610 បើកបរដោយបុរសជនជាតិបរទេសម្នាក់សង្ស័យស្រវឹងស្រាខ្លាំងធ្វើដំណើរមកពីក្រោយក្នុងល្បឿនលឿនក៏ជ្រុលទៅបុករថយន្តLAND ROVER ពីក្រោយពេញទំហឹងបណ្ដាលឱ្យរងការខូចខាត។
ក្រោយកើតហេត្តសមត្ថកិច្ចមូលដ្ឋានបានចុះមកដល់ ហើយធ្វើការឃាត់ខ្លួនអ្នកបើកបររថយន្តបង្កហេតុ និងទំនាក់ទំនងទៅផ្នែកជំនាញចុះមកធ្វើការវាស់វែងយករថយន្តទាំងពីរគ្រឿងទៅរក្សាទុករង់ចាំធ្វើការដោះស្រាយគ្នាតាមច្បាប់ ៕
ដោយ ៖ ភារ៉ា ដង្កោ
