សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានចូលទីតាំងម៉ាស្សាកោសជប់មួយកន្លែងយីហោតម្លៃ ១០.០០០រៀល ស្ថិតនៅតាមបណ្តោយផ្លូវ៣៧១ ក្នុងសង្កាត់ដង្កោ ខណ្ឌដង្កោ ខណៈពេលម៉ាស្សារួចក៏បានត្រឡប់ទៅផ្ទះវិញតែបេីកកាបូបរាប់លុយឃេីញសុទ្ធតែលុយក្លែងក្លាយចំនួន៨០០ដុល្លារនិងលុយសុទ្ធចំនួន១០០ដុល្លារក៏បង្កការភ្ញាក់ផ្អេីលដល់សមត្ថកិច្ច កាលពីវេលាម៉ោង១២យប់រំលងអធ្រាត្រឈានចូលថ្ងៃទី២៣ ខែមីនា ឆ្នាំ២០២៣ ។
តាមសម្ដីបុរសរងគ្រោះសុំមិនបញ្ចេញឈ្មោះបានរៀបរាប់ឱ្យដឹងថា មុនកើតហេតុ រូបគាត់មានលុយសុទ្ធទុកនៅក្នុងកាបូបចំនួន៩០០ដុល្លារដេីម្បីទុកទិញម៉ូតូ រួចក៏បានចូលទៅក្នុងទីតាំងម៉ាស្សារមួយកន្លែងយីហោ តម្លៃ១០.០០០រៀល ក្រោយពីម៉ាស្សារួច រូបគាត់ក៏បានជិះម៉ូតូត្រឡប់ទៅផ្ទះវិញ តែមួយសន្ទុះក្រោយមកក៏បានបើកកាបូបមើល និងរាប់លុយស្រាប់ស្រាប់តែឃើញលុយក្រដាស១០០ដុល្លារក្លែងក្លាយ ចំនួន៨០០ដុល្លារនិងលុយសុទ្ធ ចំនួន១០០ដុល្លារនៅក្នុងកាបូប ។ ភ្លាមនោះដែរបុរសរងគ្រោះក៏បានស្លន់ស្លោរត់មករកទីតាំងម៉ាស្សាវិញ និងបានទៅដាក់ពាក្យបណ្តឹងនៅប៉ុស្ដិ៍រដ្ឋបាលដង្កោ ដើម្បីសុំឱ្យសមត្ថកិច្ចមូលដ្ឋានជួយអន្តរាគមន៍ ។
ក្រោយកេីតហេតុ កម្លាំងសមត្ថកិច្ចមូលដ្ឋានសហការជាមួយនិងកងកម្លាំងអាវុធហត្ថខណ្ឌដង្កោ ចុះមកដល់និងធ្វើការសួរនាំទៅលើនារីនិងម្ចាស់ហាងម៉ាស្សា ព្រមទាំងនាំខ្លួននារីជាម្ចាស់ហាងម៉ាស្សា និងបុរសរងគ្រោះយកទៅប៉ុស្តិ៍នគរបាលរដ្ឋបាលសង្កាត់ដង្កោ ដើម្បីសួរនាំបន្តនិងដោះស្រាយតាមនីតិវិធី ៕
ដោយ ៖ ភារ៉ា ដង្កោ
