សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុសសម្នាក់បានស្លាប់បាត់បង់ជីវិតនៅនឹងកន្លែងកើតហេតុ រួមនឹងម៉ូតូមួយគ្រឿងរងការខូចខាត ខណៈកំពុងជិះម៉ូតូសុខៗត្រូវបានរថយន្តម៉ាកPRADO បើកបុកនិងកិនអូសជាច្រើនម៉ែត្រ រួចអ្នកបើករថយន្តបង្កព្យាយាមបើករត់កាលពីវេលាម៉ោង៨និង ១០នាទីយប់ថ្ងៃទី៣០ ខែមីនា ឆ្នាំ២០២៣ នៅក្បែរបុរីហ្គ្រេនភ្នំពេញ ស្ថិតនៅក្នុងភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។
សពជនរងគ្រោះមានឈ្មោះ បូវណ្ណនឿន ភេទប្រុស អាយុ៣២ឆ្នាំ មុខរបរជាងសំណង់ មានស្រុកកំណើតនៅភូមិស្រះធុល ឃុំយុទ្ធសាមគ្គី ស្រុកឧដុង្គ ខេត្តកំពង់ស្ពឺ ជនរងគ្រោះជិះម៉ូតូមួយគ្រឿងម៉ាកហុងដាឌ្រីម C125 ស៊េរីឆ្នាំ 2022 ពាក់ស្លាកលេខកំពង់ស្ពឺ1V-5283។
តាមប្រភពព័ត៌មានពីកន្លែងកើតហេតុបានឱ្យដឹងថា មុនកើតហេតុជនរងគ្រោះជិះម៉ូតូធ្វើដំណើរក្នុងទិសដៅពីជើងទៅត្បូង លុះមកដល់ចំណុចកើតហេតុខាងលើក៏មានរថយន្តម៉ាកPRADO មួយគ្រឿងពណ៌សំបកឪឡឹក ពាក់ស្លាកលេខភ្នំពេញ2C-4448ធ្វើដំណើរមកពីក្រោយហើយបានបុកនិងកិនម៉ូតូជនរងគ្រោះអូសជាច្រើនម៉ែត្របណ្តាលឱ្យស្លាប់បាត់បង់ជីវិតនៅនឹងកន្លែងកើតហេតុចំណែកម៉ូតូខូចខាតស្ទើរតែទាំងស្រុង ហើយរថយន្តបង្កមិនបានឈប់នៅកន្លែងកើតហេតុនោះទេ បានព្យាយាមបើករត់ទាំងបែកកង់ខាងមុខខាងឆ្វេងរហូតមកដល់ចំណុចមុខបុរីជីបម៉ុងលែន តាមបណ្ដោយផ្លូវលេខ៥៩៨ សង្កាត់ច្រាំងចំរេះទី២ ខណ្ឌឬស្សីកែវទើបត្រូវបងប្អូនប្រជាពលរដ្ឋឃាត់បានតែរថយន្ត រីឯអ្នកបើកបរបានរត់គេចខ្លួនបាត់។
ក្រោយកើតហេតុសមត្ថកិច្ចមូលដ្ឋានបានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំធ្វើការដោះស្រាយគ្នាតាមច្បាប់។ ដោយឡែកសពរងគ្រោះសមត្ថកិច្ចធ្វើកំណត់ហេតុប្រគល់ជូនសាច់ញាតិយកទៅស្រុកកំណើតធ្វើបុណ្យតាមប្រពៃណី៕
ដោយ៖ សុខាសែនជ័យ
