🔴ក្មេងស្រីដែលជាសិស្សបឋមនៅស្រុកកំរៀងបានលង់ទឹកស្លាប់ទាំង៥នាក់នៅក្រោយសាលារៀន

ខេត្តបាត់ដំបង៖ ក្មេងស្រីដែលជាសិស្សបឋមបានលង់ទឹកស្លាប់ព្រមៗគ្នាគួរឱ្យសង្វេគ ខណ:​​នាំគ្នា​ចុះទៅងូត​ទឹកលេងក្នុងស្រះទឹកខាងក្រោយ​សាលា។

ហេតុការណ៍​ដ៏​គួរ​ឲ្យ​រន្ធត់នេះ​បាន​កើត​ឡើងកាល​ពីថ្ងៃទី ៣០ ខែ មីនាឆ្នាំ ២០២៣ ប្រហែល​ម៉ោងជាង១២ ថ្ងៃ ត្រង់​នៅក្នុងស្រះទឹក​មួយកន្លែង ខាងក្រោយសាលា បឋមសិក្សា ស្រឡៅទង ស្ថិត​ក្នុងភូមិ​ស្រឡៅទង ឃុំកំរៀង ស្រុកកំរៀង ខេត្តបាត់ដំបង។

បើតាមសម្តីប្រជាពលរដ្ឋបានបញ្ជាក់ថា នៅមុនពេលកើតហេតុក្រុម​គ្រួសារក្មេងទាំង ៥ នាក់ បានបាត់កូនស្រីរៀងៗខ្លួន​ដោយ​មិនឃើញចេញពីសាលាត្រឡប់ទៅផ្ទះ ទើបមានការឆោរឡោព្រម​ទាំង​បានប្តឹងទៅសមត្ថកិច្ចនគរបាលប៉ុស្តិ៍ដើម្បីជួយអន្តរាគមន៍។

នៅពេលនោះប្រជាពលរដ្ឋនៅក្នុងភូមិ​បាននាំគ្នាដើរ​រកនៅក្នុងសាលា​ផង និង​ទីតាំងផ្សេងៗផងរហូត​ដល់ម៉ោង ៥ និង ២០ នាទី ល្ងាច ថ្ងៃដដែល ក៏បាន​ទៅដល់​មាត់ ស្រះ​ទឹក​ខាងក្រោយ​សាលាទើបមានការ​សង្ស័យថា ក្មេងៗទាំងអស់ប្រាកដជាលង់នៅក្នុងស្រះទឹកដោយសារតែមាន​បន្សល់​របស់របរមួយចំនួននៅទីនោះ ទើប​នាំ គ្នាចុះរាវរកក៏​បានប្រទះឃើញ​ក្មេងស្រីទាំងអស់នោះមែន។

ក្មេងស្រីទាំង៥ នាក់ នោះមាន ៖

១.ឈ្មោះ វុធ អី អាយុ៧ឆ្នាំ,២.ឈ្មោះ ជា ស្រីឌឿន អាយុ១១ឆ្នាំ, ៣. ឈ្មោះ លួង លីតា អាយុ៩ឆ្នាំ,៤.ឈ្មោះ ធីម ម៉េងលី អាយុ៩ឆ្នាំ និង ៥.ឈ្មោះ វ៉ាន់ គឹមហៀង អាយុ៩ឆ្នាំ ដោយក្មេងស្រីទាំង៥នាក់នេះ រស់នៅក្នុងភូមិ ឃុំ កើត ហេតុខាងលើ។

តាមការចុះពិនិត្យពីសំណាក់សមត្ថកិច្ចជំនាញបានអះអាងថា ក្មេងទាំង ៥នាក់ គឺ​ស្លាប់​ដោយសារ​លង់ទឹកពិត​ប្រាកដមែន ហើយនៅពេលនេះ​សាកសពកំពុងរៀបចំធ្វើបុណ្យតាមប្រពៃណី ប្រកប​ដោយភាពសោកសង្រេងជាទីបំផុត៕

ដោយ៖ សូរិយា