សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ ប្រជាពលរដ្ឋខ្មែរប្រុសស្រីចំនួន១២៣នាក់ (ក្នុងនោះមានជាតិស្បែកខ្មៅចំនួន ១១នាក់) ឆ្លងដែនខុសច្បាប់ចូលទៅធ្វើការនៅប្រទេសថៃ ត្រូវបានសមត្ថិច្ចថៃឃាត់ខ្លួន នៅរសៀលថ្ងៃទី២៤ ខែមេសា ឆ្នាំ២០២៣ ត្រង់ចំណុចភូមិលេខ៨ បានម៉ៃសុខប្រះសឺត ឃុំមឿងផៃ ស្រុកអារញ្ញ ខេត្តស្រះកែវ ប្រទេសថៃ។
លោក សួង សៅ មេបញ្ជាការនគរបាលវរសេនាតូចការពារព្រំដែនគោកលេខ៨១៥ បានឱ្យដឹងថា នៅថ្ងៃទី២៤ ខែមេសា ឆ្នាំ២០២៣ ភាគីថៃបានផ្ដល់ពត៌មានពីការឃាត់ខ្លួនពលករលួចឆ្លងដែនខុសច្បាប់ចូលប្រទេសថៃចំនួន ១២៣នាក់ (ស្រី៤៦នាក់ កុមារ០៧នាក់) ក្នុងនោះមានជាតិស្បែកខ្មៅចំនួន១១នាក់ នៅចំណុចភូមិលេខ៨ បានម៉ៃសុខប្រះសឺត ឃុំមឿងផៃ ស្រុកអារញ្ញ ខេត្តស្រះកែវ ចម្ងាយប្រហែលជាង១០គីឡូម៉ែត្រពីព្រំដែន ដោយភាគីថៃមិនបានបញ្ជាក់ពីទីតាំងដែលពលករទាំងនោះលួចឆ្លងកាត់ព្រំដែនឡើយ ។
លោកមេបញ្ជាការបានឱ្យដឹងទៀតថានៅថ្ងៃទី២៤ ខែមេសា ឆ្នាំ២០២៣ កម្លាំងនគរបាលការពារព្រំដែនប៉ុស្ដិ៍ចំបក់ចំនួន ០៥នាក់ ដឹកនាំដោយលោកវរសេនីយ៍ត្រី ប៊ុន គុន នាយប៉ុស្តិ៍បានសហការជាមួយកម្លាំងយោធាសឹករងស្រុកម៉ាឡៃ ចំនួន០៥នាក់បានទប់ស្កាត់ប្រជាពលរដ្ឋបម្រុងឆ្លងដែនខុសច្បាប់សរុបមានចំនួន១៩នាក់ (ស្រី០៧នាក់ កុមារ០៤នាក់) ត្រង់ចំណុចមាត់អូរព្រំដែន ស្ថិតក្នុងភូមិសាស្រ្ដភូមិល្វា ឃុំបឹងបេង ស្រុកម៉ាឡៃ ដែលពួកគាត់មកពីខេត្ដចំនួន ០៣គឺ៖ ១-ពោធិ៍សាត់០២នាក់, ២/-បន្ទាយមានជ័យ ១៣នាក់, ៣-ខេត្តតាកែវ០៤នាក់ ។ បន្ទាប់ពីធ្វើការសួរនាំ និងធ្វើកិច្ចសន្យារួចបានប្រគល់ពួកគាត់ជូនផ្នែកជំនាញរបស់អធិការដ្ឋាននគរបាលស្រុកម៉ាឡៃដើម្បីអនុវត្តនីតិវិធីបន្ដ ៕
ដោយ ៖ វណ្ណា
