សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្រសួងបរិស្ថាន នៅថ្ងៃទី០៦ ខែមិថុនា ឆ្នាំ២០២៣នេះ បានឱ្យដឹងថា យោងតាមការដកស្រង់ចេញពីសៀវភៅមគ្គុទេសក៍ស្តីពីបន្លែនៅប្រទេសកម្ពុជា ចាព្លូ ឬជីរភ្លូ Lolot peper មានឈ្មោះវិទ្យាសាស្ត្រ Piper sarmentosum Roxb ជារុក្ខជាតិមានស្លឹកស្រដៀងនឹងម្លូ ដែលត្រូវបានគេដាំ ឬដុះដោយឯកឯង នៅទីកន្លែងម្លប់ និងសើម ពិសេសក្រោមដើមឈើធំៗនៅតាមទីក្រុង ជនបទ ស្រុកស្រែ ចម្ការ សម្រាប់ធ្វើជាអន្លក់ ឬរបោយ ។ វាមានប្រភពដើមនៅអាស៊ីខាងត្បូង និងអាគ្នេយ៍ អូស្ត្រាលីខាងជើង។
លក្ខណៈរូបសាស្ត្រ៖ តិណជាតិ (herbaceous) តួដើមអាចវារលើដី មានថ្នាំង។ តួដើមមានផ្កាដុះត្រង់ ឡើងលើ មានស្លឹក។ នៅគល់ដើម ស្លឹករាងពងក្រពើ ឬរាងមូល តែនៅផ្នែកលើ ឬនៅចុងដើម ស្លឹករាងបេះដូង។ ស្លឹកមានក្រពេញ ផ្ទៃលើគ្មានរោម តែផ្ទៃក្រោមមាន រោមស្ដើងៗតាមទ្រនុងធំ។ ដើមមានផ្កាញី ឬផ្កាឈ្មោល (dioecious)។ កញ្ចុំផ្កាជាកួរ (spike) ចេញពីគល់ទងស្លឹក។ កញ្ចុំផ្កាឈ្មោលពណ៌ស គ្មានត្របកផ្កា គ្មាន ស្រទាប់ផ្កា មានកេសរឈ្មោល២។ ផ្កាញីគ្មានត្របក គ្មានស្រទាប់។ ផ្លែជាឌុ្រប (drupe) មានគ្រាប់តែ១ ហើយរឹង។
លក្ខណៈជីវសាស្ត្រ៖ គ្រាប់ទុំមានរសហឹរខ្លាំង និងមានក្លិនឈ្ងុយ។ រុក្ខជាតិនេះ ដុះរហ័សណាស់ រាតត្បាត ឈ្លានពានទៅលើប្រភេទរុក្ខជាតិឯទៀត ដែលបង្កគ្រោះថ្នាក់ដល់ជីវៈចម្រុះរុក្ខជាតិ។
លក្ខណៈអេកូឡូស៊ី៖ ដុះនៅលើដីសើម មានជីល្អ លើដីតាមជួរសមុទ្រ ឬដីតំបន់ខ្ពង់រាប។
ការប្រើប្រាស់៖ ជាបន្លែ៖ ស្លឹកធ្វើជាបន្លែអន្លក់បាញ់ឆែវ និងអន្លក់ផ្សេងៗ និងជាឱសថ៖ ស្លឹកអាចព្យាបាលឈឺធ្មេញ ហើមពោះ៕
ដោយ៖ សហការី
