សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ លោកឧត្តមសេនីយ៍ទោ សាត គឹមសាន ស្នងការ នៃស្នងការដ្ឋាននគរបាលខេត្តបាត់ដំបង នៅព្រឹកថ្ងៃទី០៨ ខែកញ្ញា ឆ្នាំ២០២៣នេះ បានឱ្យដឹងថា លោកវរសេនីយ៍ទោ សំ វីរះ អធិការនគរបាលស្រុកបាណន់ បានដឹកនាំកម្លាំងផ្នែកប្រឆាំងគ្រឿងញៀនរួមជាមួយកម្លាំងអន្តរាគមន៍នៃអធិការដ្ឋាននគរបាលស្រុកចុះល្បាតក្នុងភូមិសាស្រ្ត និងបង្ក្រាបបានករណីរក្សាទុកដោយខុសច្បាប់នូវសារធាតុញៀន០១ករណីក្នុងបទល្មើសជាក់ស្តែង កាលពីរសៀលម្សិលមិញនេះ នៅចំណុចភូមិធ្ង័រ ឃុំចែងមានជ័យ ស្រុកបាណន់ ខេត្តបាត់ដំបង។
បើតាមការបញ្ជាក់របស់លោក វរសេនីយ៍ទោ សំ វីរះ អធិការនគរបាលស្រុកបាណន់ បានឱ្យដឹងនៅថ្ងៃទី០៨ ខែកញ្ញានេះដែរថា៖ ក្នុងប្រតិបត្តិការចុះបង្ក្រាបខាងលេីនេះ ជាលទ្ធផលឃាត់ខ្លួនជនសង្ស័យម្នាក់ឈ្មោះ សុត សឿត ភេទប្រុសអាយុ៣៣ឆ្នាំ មានទីលំនៅភូមិធ្ង័រ ឃុំចែងមានជ័យ ស្រុកបាណន់ ខេត្តបាត់ដំបង។
ចំណែកវត្តុតាងចាប់យកបានរួមមាន៖ ម្សៅក្រាមពណ៌សថ្លាសង្ស័យជាសារធាតុញៀនចំនួន០៣ថង់ ,សម្ភារៈពាក់ព័ន្ធសម្រាប់ប្រើប្រាស់គ្រឿងញៀនមួយចំនួន ,ម៉ូតូចំនួន០១គ្រឿង ម៉ាកHONDA ឌ្រីម ពណ៌ខ្មៅ ស៊េរីឆ្នាំ2020 ពាក់ផ្លាកលេខបាត់ដំបង 1AM-1104 ,ទូរស័ព្ទដៃចំនួន01គ្រឿង។
ក្នុងប្រតិបត្តិការនោះឆ្លងតាមចម្លើយសារភាពរបស់ជនសង្ស័យខាងលេីនិងដោយបានការអនុញ្ញាតពី លោក កែវ សុជាតិ ព្រះរាជអាជ្ញានៃអយ្យការ អមសាលាដំបូងខេត្តបាត់ដំបង សមត្ថកិច្ចបានបន្តកិច្ចប្រតិបត្តិការរហូតឈានដល់ការចាប់ ឃាត់ខ្លួនជនសង្ស័យចំនួន០១នាក់ទៀត នៅចំណុចភូមិធ្ង័រ ឃុំចែងមានជ័យ ស្រុកបាណន់ ខេត្តបាត់ដំបង នាថ្ងៃដដែលវេលាម៉ោង១៤និង១០នាទីដែលជនសង្ស័យឈ្មោះ តាប់ វឿន ភេទប្រុស អាយុ៤១ឆ្នាំ មានទីលំនៅភូមិធ្ង័រ ឃុំចែងមានជ័យ ស្រុកបាណន់ ខេត្តបាត់ដំបង (ជាមេខ្លោង) ។
ចំណែកវត្ថុតាងចាប់យកបានរួមមាន៖ ម៉ូតូចំនួន០១គ្រឿង ម៉ាក HONDA ឌ្រីមសេ១២៥ ពណ៌ខ្មៅ ស៊េរីឆ្នាំ 2009 ពាក់ស្លាកលេខភ្នំពេញ 1AG-2118 ,ទូរស័ព្ទដៃចំនួន01គ្រឿង ។
បច្ចុប្បន្នជនសង្ស័យ និងវត្ថុតាងខាងលើត្រូវបាននគរបាលស្រុកបាណន់ កសាងសំណុំរឿងបញ្ជូនមកអនុវត្តតាមនីតិវិធីច្បាប់៕
ដោយ៖ អរុណរះ
