សមត្ថកិច្ចឃាត់ខ្លួនបុរសម្នាក់ក្នុងចំណោមបក្ខពួក២នាក់និងដាវសាមូរ៉ៃ១ដើម

ភ្នំពេញ ៖ ជនសង្ស័យម្នាក់ក្នុងចំណោម បក្ខពួក២នាក់រួមនឹងដាវសាមូរ៉ៃ១ដើមត្រូវបានកម្លាំងអន្តរាគមន៍ពិសេសរាជធានី សហការជាមួយកម្លាំងព្រហ្មទណ្ឌខណ្ឌសែនសុខឃាត់ខ្លួនខណៈប្រទះឃើញមានលាក់ទុកដាវសាមូរៃ៉មួយដើមនៅម៉ូតូកាលពីវេលាម៉ោង៨និង១០នាទីយប់ថ្ងៃទី១៤ ខែសីហា ឆ្នាំ២០១៦ នៅត្រង់ចំណុចស្តុបផ្លូវសហព័ន្ធរុស្ស៊ីកែងនឹងផ្លូវ១០១៩ ស្ថិត ក្នុងភូមិទឹកថ្លា សង្កាត់ទឹកថ្លា ខណ្ឌសែនសុខ។

ប្រភពពីសមត្ថកិច្ចបានឲ្យដឹងថា ជន សង្ស័យខាងលើមានឈ្មោះ សាយ សុធីម អាយុ១៧ឆ្នាំ មុខរបរកសិករ ស្នាក់នៅភូមិ-សង្កាត់ស្នោ ខណ្ឌពោធិ៍សែនជ័យ។ ដោយ ឡែកជនសង្ស័យជាបក្ខពួករត់គេចខ្លួននោះមានឈ្មោះ ហៀង ភេទប្រុស អាយុ ២២ឆ្នាំ មុខរបរនៅផ្ទះ ស្នាក់នៅសង្កាត់ ពន្សាំង ខណ្ឌព្រែកព្នៅ ជាម្ចាស់ម៉ូតូខាងលើម៉ាកស៊ុយហ្ស៊ុយគឺនិច បិទតែមពណ៌ ទឹកក្រូច ពាក់ស្លាកលេខ ភ្នំពេញ 1CF- 3897 ។

នៅចំពោះមុខសមត្ថកិច្ចជនសង្ស័័យ បានឆ្លើយសារភាពថារូបគេមិនដឹងថា ក្នុងម៉ូតូមានលាក់ទុកដាវសាំមូរ៉ៃនោះទេ ព្រោះរូបគេត្រូវបានមិត្តភក្ដិទៅយកពីផ្ទះបំណងទៅដើរលេងនៅឯមជ្ឈមណ្ឌលកោះពេជ្រ ហើយពេលមកដល់ចំណុចខាងលើក៏ត្រូវបានសមត្ថកិច្ចឃាត់ខ្លួនតែម្ដងទៅ។

បើទោះបីជាជនសង្ស័យបានឆ្លើយយ៉ាង នេះក្តីក៏សមត្ថកិច្ចត្រូវតែបញ្ជួនជនសង្ស័យរូបនេះទៅអធិការដ្ឋាននគរបាលខណ្ឌសែន សុខដើម្បីចាត់ការទៅតាមនីតិវិធីដែរ ៕ តុង សីហា