សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ យ៉ាងហោចមនុស្ស ចំនួន៣នាក់បានរងរបួសធ្ងន់ស្រាលនៅក្នុងហេតុការណ៍គ្រោះថ្នាក់ចរាចរណ៍រថយន្ត កាមរីបាឡែនបុកគោយន្ត ខណៈកំពុងធ្វើ ដំណើរស្របទិសគ្នានៅលើកំណាត់ផ្លូវជាតិលេខ៥។
ហេតុការណ៍នេះបានកើតឡើងកាលពីវេលាម៉ោង៥និង៤៥នាទីព្រឹក ថ្ងៃទី១៩ ខែសីហា ឆ្នាំ២០១៦ នៅលើកំណាត់ផ្លូវ ជាតិលេខ៥ ស្ថិតក្នុងភូមិអូរស្តៅ សង្កាត់ ស្វាយអាត់ ក្រុង-ខេត្តពោធិ៍សាត់ ។
នគរបាលចរាចរខេត្តពោធិ៍សាត់បាន ឲ្យដឹងថា ហេតុការណ៍នេះបង្កឡើងដោយ អ្នកបើកបររថយន្ត១គ្រឿងម៉ាកតូយ៉ូតា កាមរីបាឡែនពណ៌សំបកឪឡឹក ពាក់ស្លាក លេខភ្នំពេញ2R-4177 ធ្វើដំណើរលើ កំណាត់ផ្លូវជាតិលេខ៥ ក្នុងទិសដៅពីលិច ទៅកើត។ លុះមកដល់ចំណុចកើតហេតុ ខាងលើបានរេចង្កូតបុកគោយន្តកន្ត្រៃពេញទំហឹង ខណៈកំពុងធ្វើដំណើរស្របទិសគ្នា បណ្ដាលឲ្យរថយន្តបង្កឲ្យខូចខាតយ៉ាង ដំណំហើយអ្នកបើករថយន្តគេចខ្លួនបាត់។ ចំណែកគោយន្តកន្ត្រៃបានខ្ទាត់ចូលទឹក ស្នាមភ្លោះរងរបួសមនុស្សចំនួន៣នាក់។
ប្រភពបនថា ជនរងរបួសទាំង៣នាក់ ខាងលើរហូតមកដល់រសៀលថ្ងៃដដែល សមត្ថកិច្ចនៅពុំទាន់បានបញ្ជាក់ថា ប្រុស ប៉ុន្មានស្រីប៉ុន្មានឈ្មោះអ្វីនោះទេ គ្រាន់តែគេ ដឹងថា ជនរងរបួសទាំង៣នាក់នេះធ្ងន់ចំនួន២នាក់ស្រាលម្នាក់ រស់នៅភូមិបឹងប្រីយ៍ ឃុំ ត្រពាំងជង ស្រុកបាកាន ខេត្តពោធិ៍សាត់ ជនរងរបួសទាំង៣នាក់ ក្រោយកើតហេតុគេ បញ្ជូនទៅសង្គ្រោះនៅមន្ទីរពេទ្យបង្អែកស្រុកបាកាន។ ចំណែកគោយន្តកន្ត្រៃនិងរថយន្ត សមត្ថកិច្ចយកទៅរក្សាទុកនៅការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តដើម្បីរង់ចាំដោះស្រាយតាម នីតិវិធី៕ ប៉ឹម ពិន
