សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ត្រូវប្រជាពលរដ្ឋចាប់ប្រគល់ឲ្យសមត្ថកិច្ចប៉ុស្តិ៍ភ្នំពេញថ្មី ខណៈកំពុងធ្វើសកម្មភាពគាស់សោបន្ទប់ជួលកម្មការនីរោងចក្រ កាលពីវេលាម៉ាង ០៨និង២០នាទីព្រឹកថ្ងៃទី ២២ ខែសីហា ឆ្នាំ២០១៦ នៅចំណុចបន្ទប់ជួល៣៣ ផ្លូវ២០០០ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។
ជនសង្ស័យមានឈ្មោះ ឌី យ៉ុង ភេទប្រុស អាយុ២៣ឆ្នាំ មុខរបរកម្មកសំណង់ ស្នាក់នៅភូមិច្រេស សង្កាត់ភ្នំពេញថ្មី ខណ្ឌសែនសុខ ។ ចំណែកជនរងគ្រោះ មានឈ្មោះ វុធ ធា ភេទស្រីអាយុ២០ឆ្នាំ មុខរបរកម្មការនីរោងចក្រស្នាក់នៅបន្ទប់ជួលកន្លែងកើតហេតុខាងលើ និងមានស្រុកកំណើត ភូមិក្រោលគោ ឃុំក្រោលគោ ស្រុកស្វាយជ្រុំ ខេត្តស្វាយរៀង។
ប្រភពព័ត៌មានពីកន្លែងកើហេតុបានអោយដឹងថា មុនពេលកើតហេតុ គេឃើញជនសង្ស័យខាងលើជិះម៉ូតូ១គ្រឿងម៉ាកសង់ប៉ិច ពណ៍ខ្មៅពាក់ស្លាកលេខ ភ្នំពេញ 1CN.8293 លុះមកដល់ចំណុចកើតហេតុរូបគេក៍បានឈប់ហើយដើរចូលទៅកន្លែងបន្ទប់ជួលហើយធ្វើសកម្មភាពយកដែកកែឆ្នៃចុងស្រួចឆ្កិះសោបន្ទប់ជួលខាងលើយកបានទូរស័ព្ទចំនួន២គ្រឿងដាក់ក្នុងសាក់កាដូហើយក៍មានប្រជាពលរដ្ឋនៅជិតនោះឃើញក៍នាំគ្នាចាប់ប្រគល់អោយសមត្ថកិច្ចប៉ុស្តិ៍ភ្នំពេញថ្មីតែម្តង ។
បច្ចុប្បន្នជនសង្ស័យកំពុងសាកសួរនៅប៉ុស្តិ៍នគរបាលរដ្ឋបាលភ្នំពេញថ្មី និងបញ្ជួនខ្លួនទៅអធិការដ្ឋានខណ្ឌសែនសុខចាត់ការបន្ត ៕ តុង សីហា
