រថយន្តបុកចូលផ្សារបុណ្យណូអែលក្នុងប្រទេសអាល្លឺម៉ង់ ស្លាប់និងរបួសរាប់សិបនាក់

ចែករំលែក៖

សារព័ត៌មាន CNN បានផ្សាយថា នៅល្ងាចថ្ងៃទី 20 ខែធ្នូ រថយន្តមួយគ្រឿងបានបុកចូលផ្សារ Christmas ក្នុងទីក្រុង Magdeburg របស់អាល្លឺម៉ង់ ដោយបានសម្លាប់មនុស្ស 2 នាក់ (មនុស្សពេញវ័យ 1 នាក់ ទារក 1 នាក់) និងរបួសជិត 70 នាក់ ។

ក្នុងចំណោមអ្នករងរបួសមាន១៥នាក់របួសធ្ងន់។ មន្ត្រីមូលដ្ឋានបាននិយាយថា ជនសង្ស័យដែលបង្កគ្រោះថ្នាក់ចរាចរណ៍នេះជាបុរសអាយុ៥០ឆ្នាំជនជាតិអារ៉ាប៊ីសាអូ៊ឌីត មានទីលំនៅអចិន្ត្រៃយ៍។ អ្នកនេះជាវេជ្ជបណ្ឌិតម្នាក់ដែលរស់នៅក្នុងប្រទេសអាល្លឺម៉ង់តាំងពីឆ្នាំ ២០០៦។ ដំបូងគេបានកំណត់ថាគាត់ធ្វើសកម្មភាពតែម្នាក់ឯង ហើយគ្មានអាវុធផ្ទុះនៅក្នុងរថយន្តឡើយ ។
ស្ថានីយទូរទស្សន៍ MDR បានរាយការណ៍ថា នៅកន្លែងកើតហេតុ ជនរងគ្រោះដែលរងរបួសស្រាល ត្រូវបាននាំទៅកាន់មជ្ឈមណ្ឌលលក់ទំនិញក្បែរនោះ ដើម្បីសង្គ្រោះបឋម។ អ្នកពន្លត់អគ្គិភ័យប្រហែល 100 នាក់ និងអ្នកជួយសង្គ្រោះ 50 នាក់បានបំពេញការងារនេះ។ ប៉ូលិសបានបិទទីតាំងទាំងមូល។
រដ្ឋមន្ត្រីក្រសួងមហាផ្ទៃអាល្លឺម៉ង់ លោកស្រី Nancy Faeser បាននិយាយថា អាជ្ញាធរកំពុងព្យាយាមបំភ្លឺករណីនេះ។ នាយករដ្ឋមន្រ្តី Olaf Scholz បានផ្ញើការរំលែកទុក្ខរបស់គាត់ហើយរៀបចំទៅ Magdeburg នៅថ្ងៃទី 21 ខែធ្នូ។ ប្រធានាធិបតីបារាំង គណៈកម្មការអឺរ៉ុប (EC) និងសេតវិមានក៏បានសម្តែងការរំលែកទុក្ខផងដែរ។ ក្រសួងការបរទេសអារ៉ាប៊ីសាអូ៊ឌីត បានថ្កោលទោសចំពោះការធ្លាក់រថយន្តនេះ។ បច្ចុប្បន្នមិនមានអ្នកណាចេញមុខអះអាងទទួលខុសត្រូវទេ។
ទីផ្សារបុណ្យណូអែលដែលមានមនុស្សច្រើននៅដំណាច់ឆ្នាំ គឺជាគោលដៅចម្បងសម្រាប់ពួកជ្រុលនិយម។ កាលពីឆ្នាំ 2016 បុរសទុយណេស៊ីម្នាក់បានបុករថយន្តរបស់គាត់ចូលទៅក្នុងទីផ្សារបុណ្យណូអែលនៅទីក្រុងប៊ែរឡាំងដោយបានសម្លាប់មនុស្ស 13 នាក់។ អង្គការភេរវជន IS បានអះអាងទទួលខុសត្រូវនៅពីក្រោយហេតុការណ៍នេះ៕ ដោយ៖ ធីរីណា