សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជន២នាក់ជិះម៉ូតូក្នុងស្ថានភាពស្រវឹងជ្រុលទៅទាក់ដៃចង្កូត និងម៉ូតូមួយគ្រឿងទៀតដែលធ្វើដំណើរស្របទឹសគ្នាបណ្តាលអោយដួលអូសប្រហែល១០ម៉ែត្ររងរបួសធ្ងន់ស្រាល៥នាក់ បង្កអោយមានការភ្ញាក់ផ្អើលកាលពីវេលាម៉ោង ៧និង៣០នាទីយប់ថ្ងៃទី១៩ ខែកញ្ញាឆ្នាំ២០១៦ តាមបណ្តោយផ្លូវR6 ស្ថិតក្នុងសង្កាត់ស្រះចក ខណ្ឌដូនពេញ ។
ម៉ូតូបង្ករម៉ាក ហុងដាឌ្រីមឆ្នាំ២០០៦ពណ៌ខ្មៅពាក់ស្លាកលេខ កំពង់ធំ 1B-5734 ជិះដោយបុរស២នាក់ឌុបគ្នា ចំណែកម៉ូតូរងគ្រោះម៉ាក ហុងដាឌ្រីមឆ្នាំ២០១៤ពណ៌ខ្មៅពាក់ស្លាកលេខភ្នំពេញ 1CB-4070 ជិះឌុបគ្នា៣នាក់ ទាំងជនរងគ្រោះនិងជនបង្ករសុទ្ធតែមិនត្រូវបានស្គាល់អត្តសញ្ញាណ ។
តាមសំដីរបស់ជនរងគ្រោះម្នាក់ដែលរងរបួសស្រាលបានអោយដេងថា មុនពេលកើតហេតុរូបគេជិះម៉ូតូឌុបគ្នា៣នាក់បងប្អូន(ប្រុសទាំងអស់)តាមបណ្តោយផ្លូវR6ក្នុងទឹសដៅពីត្បូងទៅជើង ពេលជិះដល់ពាក់កណ្តាលផ្លូវ(ក្បែរតារាងបាល់ទាត់ស្មៅសុប្បនិមត្ត) រូបគេដែលអង្គុយនៅពីក្រោយគេបានឃើញម៉ូតូបង្ករជិះឌុបគ្នា២នាក់ក្នុងស្ថានភាពស្រវឹងរ៉េពេញផ្លូវ ឃើញសភាពមិនស្រួលរូបគេបានប្រាប់ប្អូនប្រុសគេថា កុំជិះក្បែរម៉ូតូស្រវឹងហ្នឹងអីខ្លាចមានគ្រោះថ្នាក់ ជិះទៅអោយឆ្ងាយទៅ ។
ប្រភពដដែលបានបន្តទៀតថា គ្រាន់តែនិយាយរួចមិនបានប៉ុន្មានផងស្រាប់តែម៉ូតូបង្ករបានជិះមកឆាបដៃចង្កូតខាងឆ្វេងរបស់គេបណ្តាលអោយដួលទីងណាត់ទីងណែង អូសប្រហែល១០ម៉ែត្ររបួសពាសពេញផ្លូវតែម្តងទៅ ។
ក្រោយពេលកើតហេតុជនរងគ្រោះទាំង៤នាក់ត្រូវបានរថយន្តសង្គ្រោះដឹកយកទៅព្យាបាលនៅក្លីនិចឯកជនទាំងអស់ រីឯអ្នករបួសស្រាលមិនបានទៅទេ ចំណែកម៉ូតូទាំង២ត្រូវបានសម្ថកិច្ចចុះមកវាស់វែងយុំទៅរក្សាទុកនៅអធិការដ្ឋានខណ្ឌដូនពេញ ដើម្បីរងចាំភាគីទាំង២ចូលខ្លួនមកដោះស្រាយនៅពេលក្រោយ ៕ ព្រែកជ័យ
