សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ មនុស្សប្រុសស្រី៤នាក់ រងរបួសធ្ងន់ ស្រាលដោយសារគ្រោះថ្នាក់ចរាចរណ៍រវាងមូតូ នឹងម៉ូតូបុកគ្នាពីក្រោយ ស្របទិសគ្នាកាលពី វេលាម៉ោង១និង៥៥នាទីរសៀល ថ្ងៃទី២៥ ខែកញ្ញា ឆ្នាំ២០៦ នៅលើផ្លូវជាតិលេខ1 ត្រង់ចំណុចមុខប៉ុស្ដិ៍នគរបាល រដ្ឋបាលសង្កាត់បាវិត ស្ថិតនៅក្នុងភូមិតាបឹប សង្កាត់បាវិត ក្រុងបាវិត ខេត្តស្វាយរៀង ។
សមត្ថកិច្ចនគរបាលបានឲ្យដឹងថា មុនពេលកើតហេតុ មានម៉ូតូ១គ្រឿងម៉ាក SANNYAN ពណ៌ប្រផេះ គ្មានស្លាកលេខ បើកបរដោយឈ្មោះម៉ឺន ស្រីកា ភេទស្រី អាយុ១៥ឆ្នាំ រស់នៅភូមិបាវិតលើ សង្កាត់បាវិត ក្រុងបាវិត ខេត្តស្វាយរៀង និងអ្នករួមដំណើរម្នាក់ឈ្មោះម៉ឺន វាសនា ភេទប្រុស អាយុ5ឆ្នាំរស់នៅភូមិ សង្កាត់ជាមួយគ្នាបើកបរពីកើតទៅលិច លុះមកដល់ចំណុខាងលើ ក៏បានបត់ឆ្វេងខ្វះការប្រុងប្រយ័ត្ន មិនមើលឆ្វេងស្ដាំ ក៏ត្រូវម៉ូតូម៉ាក YAMAHA EXCITER ពណ៌ក្រហម គ្មានផ្លាកលេខបើកបរដោយឈ្មោះសេក ផានសុវណ្ឌី ភេទប្រុស អាយុ21ឆ្នាំ រស់នៅភូមិក្រញូង ឃុំរមាំងថ្កោល ស្រុកស្វាយទាប និងអ្នករួមដំណើរម្នាក់ឈ្មោះជិន កុសល ភេទប្រុស អាយុ១៩ឆ្នាំ រស់នៅភូមិឃុំជាមួយគ្នា បើកបរពីកើតទៅលិចស្របទិសគ្នាចាប់ហ្វ្រាំងមិនទាន់បុកពេញទំហឹង បណ្ដាលអោយដួលរណូករណែលទាំងមនុស្សនិងម៉ូតូតែម្ដង ។
ក្រោយមក អ្នកភូមិបានមកចោមរោមមើល និងរាយការណ៍មកសមត្ថកិច្ចមូលដ្ឋាន មកអន្តរាគមន៍ដឹកភាគីទាំងសងខាងមកកាន់មន្ទីរពេទ្យបង្អែកខេត្តស្វាយរៀង ប៉ុន្តែដោយស្ត្រីឈ្មោះម៉ីន ស្រីកា រងរបួសធ្ងន់ ត្រូវបានបញ្ជូនទៅមន្ទីរពេទ្យប្រទេសវៀតណាម ដើម្បីសង្គ្រោះជីវិត ។
ក្រោយពីវាស់វែង សមត្ថកិច្ចបានយកមធ្យោបាយទាំង២គ្រឿង រក្សាទុកនៅអធិការដ្ឋាននគរបាលក្រុងបាវិត ដើម្បីបំពេញសំណុំរឿងតាមច្បាប់ ។
សមត្ថកិច្ចបញ្ជាក់ថា ករណីគ្រោះថ្នាក់នេះ កើតឡើងដោយសារមូលហេតុ ម៉ូតូម៉ាក SANNYAN បត់ឆ្វេង ខ្វះការប្រុងប្រយ័ត្ន ៕ យឹម សុថាន
