សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ កាលពីវេលាម៉ោង១៩និង២៩នាទី ថ្ងៃទី១៧ ខែតុលា ឆ្នាំ២០១៦ មានគ្រោះថ្នាក់ចរាចរណ៍នៅលើកំណាត់ផ្លូវជាតិលេខ៦ ត្រង់ចំណុចភូមិស្ដុកស្ដម ឃុំជ្រាប់ ស្រុកសន្ទុក ខេត្តកំពង់ធំ បណ្ដាលឲ្យអ្នកជិះម៉ូតូរងរបួសធ្ងន់ ។
តាមប្រភពព័ត៌មានពីសមត្ថកិច្ចនគរបាលចរាចរណ៍បានឲ្យដឹងថា ករណីគ្រោះថ្នាក់ចរាចរណ៍នេះ គឺបណ្ដាលមកពីរថយន្ដម៉ាកហ៊ីយ៉ានដាយ ពណ៌ខៀវ ពាក់ផ្លាកលេខ ភ្នំពេញ ៣B.៥៥៣៨ ឈប់ចតនៅចិញ្ចើមផ្លូវ ដោយបើកភ្លើងសញ្ញាមុខក្រោយ រួចចូលទៅហូបបាយ ក្រោយមកអ្នកជិះម៉ូតូ ម៉ាកសង់ សេ ១០០ ពណ៌ក្រហម គ្មានស្លាកលេខ បើកបរដោយឈ្មោះ ថេង ធ័ង ភេទប្រុស អាយុ២៥ឆ្នាំ រស់នៅភូមិទួលវិហា ឃុំជ្រាប់ ស្រុកសន្ទុក បានបើកមកបុករថយន្តពីក្រោយបណ្តាលឲ្យដួលរងរបួសធ្ងន់ ។
ប្រភពបន្តថា អ្នកបើកបររថយន្ដ ដោយឃើញសភាពមិនស្រួល ក៏បានរត់គេចខ្លួនបាត់ស្រមោល ហើយសមត្ថកិច្ចនៅមិនទាន់ស្គាល់អត្តសញ្ញាណឡើយ ។
ក្រោយពីកើតហេតុ សមត្ថកិច្ចបញ្ជូន ជនរងគ្រោះទៅមន្ទីរពេទ្យបង្អែកបារាយណ៍សន្ទុក រីឯមធ្យោបាយ ត្រូវចាត់ចែងតាមនីតិវិធីដើម្បីឲ្យម្ចាស់រថយន្ដចូលខ្លួនមកដោះស្រាយគ្នាតាមច្បាប់ ៕ ប៊ុនរិទ្ធី
