សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង ៖ ប្តីប្រពន្ធពីរនាក់ រងរបួសធ្ងន់ ត្រូវបានគេដឹកយកមកសង្រ្គោះនៅមន្ទីរពេទ្យបង្អែកខេត្តកំពង់ឆ្នាំង បន្ទាប់ជនរងគ្រោះទាំងពីរនាក់ ត្រូវរថយន្តបុកពេញពីក្រោយពេញទំហឹងបណ្តាលឲ្យសន្លប់ស្តូកស្តឹងនៅលើកណ្តាលទ្រូងផ្លូវ ។
ហេតុការណ៍នេះ បានកើតឡើងកាលពីវេលាម៉ោង៦និង១០នាទីល្ងាច ថ្ងៃទី១៨ ខែតុលា ឆ្នាំ២០១៦ នៅចំណុចមុខវិទ្យាល័យប៊ុនរ៉ានីហ៊ុនសែនរលាប្អៀរ តាមកំណាត់ផ្លូវជាតិលេខ៥ ស្ថិតនៅក្នុងភូមិព្រៃខ្មែរ ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង ។
លោកយី ធីម នាយប៉ុស្តិរលាប្អៀរ បានអោយដឹងថា ជនរងគ្រោះ ក្នុងឧប្បត្តិហេតុគ្រោះថ្នាក់ចរាចរណ៍ ប្តីឈ្មោះ ឡូញ អាយុ៣៦ឆ្នាំ និងប្រពន្ធឈ្មោះសេត អាយុ៣៤ឆ្នាំ រស់នៅក្នុងឃុំគោកបន្ទាយ ស្រុករលាប្អៀរ ខេត្តកំពង់ឆ្នាំង ។
លោកនាយប៉ុស្តិ៍បានឲ្យដឹងទៀតថា នៅមុនពេលកើតហេតុ ជនរងគ្រោះទាំង២នាក់បានជិះម៉ូតូម៉ាកសេ១០០ កូរ៉េ ពណ៌ក្រហម អត់ស្លាកលេខ ធ្វើដំណើរពីត្បូងទៅជើង នៅពេលមកដល់ចំណុចកើតហេតុ ជនរងគ្រោះបានបត់ឆ្វេង ជួនពេលនោះ រថយន្ត ម៉ាកសាំយ៉ុងកូរ៉េ ពណ៌ស ពាក់ស្លាកលេខ ភ្នំពេញ ២V-៣៨៣០ ដែលបើកក្នុល្បឿនយ៉ាងលឿន ទិសដៅស្របគ្នា បានបុកម៉ូតូសង់កូរ៉េពេញមួយទំហឹង បណ្តាលឲ្យជនរងគ្រោះទាំងពីរ នាក់ប្តីប្រពន្ធសន្លប់ស្តូកស្តឹងតែម្តង ។
ក្រោយពេលកើតហេតុ ជនរងគ្រោះត្រូវបានគេដឹកយក ទៅសង្រ្គោះនៅមន្ទីរពេទ្យបង្អែកខេត្ត ចំណែកឯកអ្នកបើកបរថយន្តបង្ករ បានចុះរត់គេចខ្លួន ។
មធ្យោបាយយានយន្តត្រូវបានសមត្ថកិច្ចយកទៅរក្សាទុកនៅ អធិការដ្ឋាននគរបាលស្រុករលាប្អៀរ ដើម្បីរង់ចាំធ្វើការដោះស្រាយតាមនីតិវិធី ៕ ចន្ថា
