ស្រវឹងស្រា បង្ហោះរថយន្តបុកបង្គោលភ្លើងទាំងកម្រោល ខូចខាតយ៉ាងដំណំ

ភ្នំពេញ៖ បុរសម្នាក់ស្រវឹងស្រាជោកជាំ និងបើករថយន្តសេរីទំនើបលឿនដូចហោះ ដល់ផ្លូវកែងបួងចង្កូតមិនទាន់ ក៏ជ្រុលទៅបុកបង្គលភ្លើងដែកពេញទំហឹងបណ្ដាលឲ្យរងការខូចខាតរថយន្តបង្កផ្នែកខាងមុខយ៉ាងដំណំ សំណាងល្អមិនគ្រោះថ្នាក់ដល់ជីវិត ។

ហេតុការណ៍នេះបានកើតឡើងនៅវេលាម៉ោង១១និង៣៥នាទីយប់ ថ្ងៃទី២០ ខែតុលា ឆ្នាំ២០១៦ តាមបណ្ដោយផ្លូវលេខ៦៣កែងនឹងផ្លូវលេខ៤៦៦ ត្រង់ចំណុចមុខសាលាភូមិមិន្ទរដ្ឋបាល ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។

ព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្តម៉ាក.LAND CRUISER ពណ៌ស្ករ ពាក់ស្លាកលេខ ភ្នំពេញ២M ៦៥០៦ បើកបរដោយបុរសម្នាក់ ក្នុងស្ថានភាពស្រវឹងស្រាជោក ទិសដៅពីជើងទៅត្បូង បើកក្នុងល្បឿនលឿនដូចហោះ លុះមកដល់ចំណុចកើតហេតុ ផ្លូវកែងបួងចង្កូតមិនទាន់ បានជ្រុលទៅបុកបង្គោលភ្លើងដែកពេញទំហឹងលាន់សូរដូចរន្ទះ បណ្ដាលឲ្យរថយន្តរងការខូចខាតផ្នែកខាងមុខយ៉ាងដំណំ និងផ្ទុះពោង តែមិនបង្កគ្រោះថ្នាក់ដល់អាយុជីវិតនោះទេ ។ ភ្លាមៗ នោះផងដែរ គេឃើញអ្នកបើកបររថយន្តបានបើកទ្វារចេញហើយមានម៉ូតូ១គ្រឿងជិះមកឌុបយកទៅបាត់ដោយបន្សល់ទុករថយន្តនៅនឹងកន្លែងកើតហេតុ ។

ក្រោយកើតហេតុ សមត្ថកិច្ចមូលដ្ឋានបានមកដល់ហើយទំនាក់ទំនងទៅសមត្ថកិច្ចជំនាញមកវាស់វែងយករថយន្តបង្ករទៅរក្សាទុកនៅការិយាល័យចរាចរណ៍រាជធានីភ្នំពេញរង់ចាំម្ចាស់ចូលខ្លួនមកដោះស្រាយតាមនីតិវិធីច្បាប់នៅពេលក្រោយ៕ ជីម ភារ៉ា ដង្កោ