🔥ឆេះរោងចក្រមួយកន្លែងយ៉ាងសន្ធោសន្ធៅផ្អើលដល់សមត្ថកិច្ចជំនាញចេញរថយន្តពន្លត់អគ្គិភ័យបាញ់ទឹកពន្លត់

ភ្នំពេញ​ ៖ មានការភ្ញាក់ផ្អើលយ៉ាងខ្លាំងខណៈមានគ្រោះអគ្គិភ័យមួយបានឆាបឆេះរោងចក្រមួយកន្លែងយ៉ាងសន្ធោសន្ធៅហេីយត្រូវបានអាជ្ញាធរ​និងសមត្ថកិច្ចជំនាញចេញរថយន្តពន្លត់អគ្គិភ័យទៅជួយអន្តរាគមន៍បាញ់ទឹកពន្លត់ជាច្រើនគ្រឿង​កាលពីវេលាម៉ោង១០:២០នាទីយប់ថ្ងៃទី ០៩ ខែកក្កដា ឆ្នាំ២០២៦ស្ថិតនៅផ្លូវវេងស្រេង សង្កាត់ចោមចៅទី២ ខណ្ឌពោធិ៍សែនជ័យ​ រាជធានីភ្នំពេញ។

​     តាមប្រភពព័ត៌មានពីប្រជាពលរដ្ឋដែលរស់នៅក្បែរកន្លែងកើតហេតុបានឲ្យដឹងថា​ នៅមុនពេលកើតហេតុពួកគាត់បានឃើញផ្សែងលាយឡំនឹងអណ្តាតភ្លើងឆេះចេញពីកន្លែងទុកក្រណាត់យ៉ាងសន្ធោសន្ធៅ​ ភ្លាមៗនោះដែរក៏មានសន្តិសុខនិងកម្មករស្នាក់នៅក្នុងនោះនាំគ្នាទាញបំពង់ពន្លត់អគ្គិភ័យនិងទុយយោទឹកដើម្បីបាញ់ពន្លត់ទប់ស្កាត់ជាបណ្តោះអាសន្ន រួចរាយការណ៍ទៅសមត្ថកិច្ចជំនាញសុំរថយន្តពន្លត់អគ្គិភ័យមកជួយអន្តរាគមន៍ជាបន្ទាន់។ 

​   ក្រោយមកខាងកម្លាំងសមត្ថកិច្ចជំនាញបង្ការពន្លត់អគ្គិភ័យនិងសង្គ្រោះ នៃស្នងការដ្ឋាននគរបាលរាជធានីភ្នំពេញ ទទួលបានដំណឹងខាងលើក៏បញ្ជាឲ្យក្រុមរថយន្តពន្លត់អគ្គិភ័យគ្រប់គោលដៅចេញទៅជួយបាញ់ទឹកពន្លត់ភ្លាមៗផងដែរ។ បន្ទាប់ពីកម្លាំងជំនាញធ្វើប្រតិបត្តិការបាញ់ទឹកពន្លត់ចប់ឃើញថាប្រើប្រាស់រថយន្តទឹកអស់ជាច្រើនគ្រឿងទើបរលត់ទៅវិញជាស្ថាពរ ដែលក្នុងនោះដែរមិនមានអ្នកស្លាប់ឬរងរបួសនោះទេ ពោលគឺគ្រាន់តែខូចខាតសម្ភារៈមួយចំនួនប៉ុណ្ណោះ។ ចំពោះមូលហេតុនៃការឆេះ មន្រ្តីជំនាញធ្វើការស្រាវជ្រាវនៅពេលក្រោយ៕​

ដោយ​ ៖​ ភារ៉ា​ ដង្កោ