សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ កាលពីវេលាម៉ោង ៤និង២០នាទីរសៀល ថ្ងៃទី៩ ខែវិច្ចិកា ឆ្នាំ២០១៦ កំលាំងសមត្ថកិច្ចមេព្រៃសង្កាត់កំពង់ស្វាយ សហការជាមួយមេព្រៃផ្នែកស្ទោង ដឹកនាំដោយលោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ ចុះស្ទាក់ចាប់ រថយន្ដកាមរីហើម ១គ្រឿង លួចដឹកឈើគ្រញូង ចេញពីខេត្តព្រះវិហារ បម្រុងឆ្លងកាត់ខេត្តកំពង់ធំ ត្រូវបានជាប់អន្ទាក់សមត្ថកិច្ចនៅចំណុចភូមិ កូន ត្នោត ឃុំជ័យ ស្រុកកំពង់ស្វាយ ខេត្តកំពង់ធំ។
តាមប្រភព័ត៌មានពីសមត្ថកិច្ចបានឲ្យដឹងថា ក្រោយពីទទួលព័ត៌មានពីភ្នាក់ងារសង្ងាត់រួចមក ក៏បានត្រៀមកំលាំង ស្ទាក់ចាប់នៅចំណុចខាងលើ ដោយឃាត់បានមនុស្សម្នាក់ និងរថយន្ដកាមរីហើម១គ្រឿង ពណ៌សំបកឪឡឹក ពាក់ស្លាកលេខ កំពង់ស្ពឺ ២A ០២២៨ បើកបរដោយជនសង្ស័យ ឈ្មោះ ប៉ិល វណ្ណ ភេទប្រុស អាយុ ៤១ឆ្នាំ រស់នៅភូមិសំរោង ឃុំចុងដូង ស្រុកបារាយណ៍ ខេត្តកំពង់ធំ ។
ក្រោយពេលឃាត់ខ្លួន ត្រូវបានសមត្ថកិច្ចបញ្ចូលទាំងមនុស្ស និងវត្ថុតាងមករក្សាទុកនៅផ្នែករដ្ឋបាលស្ទោងដើម្បីវាស់វែង ព្រមទាំងកសាងសំណុំរឿងបញ្ជូលជនសង្ស័យទៅឃុំខ្លួនបណ្ដោះអាសន្ន នៅស្នងការនគរបាលខេត្តកំពង់ធំ រង់ចាំបញ្ជូនបន្តទៅតុលាការ ៕ ប៊ុន រិទ្ធី
