សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល៖ យុវជន២នាក់បានស្លាប់នៅកន្លែងកើតហេតុនិងម្នាក់ទៀតរងរបួស ធ្ងន់ក្នុងករណីគ្រោះថ្នាក់ចរាចរណ៍ជិះម៉ូតូបុកជាមួយរថយន្តកាលពីវេលាម៉ោង២និង១៥នាទីរំលងអធ្រាត្រ ឈានចូលថ្ងៃទី៩ ខែធ្នូ ឆ្នាំ២០១៦ នៅលើកំណាត់ផ្លូវជាតិលេខ១ ចន្លោះគីឡូម៉ែត្រលេខ៣៧-៣៨ ចំណុចផ្លូវ កោង ស្ថិតក្នុងភូមិព្រែកតាកែវ ឃុំសំរោងធំ ស្រុកកៀនស្វាយ ខេត្តកណ្តាល ។
ជនរងគ្រោះមានឈ្មោះ១-តក់ ភ័ក្ត្រា ភេទប្រុស អាយុ១៨ឆ្នាំ រងរបួសធ្ងន់, ២-ឈ្មោះ នុត ភេទប្រុស អាយុ១៨ឆ្នាំ ស្លាប់ នៅកន្លែងកើតហេតុ និងទី៣-ឈ្មោះ សៅ ដាវី ហៅឈុយ ភេទប្រុស អាយុ១៧ឆ្នាំ ស្លាប់ នៅកន្លែងកើតហេតុ។
ជនរងគ្រោះទាំង៣នាក់មានទីលំនៅក្នុងឃុំអង្គររាជា ស្រុកព្រះស្តេច ខេត្តព្រៃវែងជា មួយគ្នា។
លោកព្រំ សំណាង អធិការរងនគរបាលស្រុកកៀនស្វាយទទួលបន្ទុកសណ្តាប់ធ្នាប់ចរាចរណ៍បានឲ្យដឹងថា តាមការពិនិត្យនៅកន្លែងកើតហេតុមុនពេលគ្រោះថ្នាក់ជនរងគ្រោះទាំង៣នាក់ជិះម៉ូតូ១គ្រឿងម៉ាកស៊ុយហ៊្សុយគីឡេត បើកបរតាមបណ្តោយផ្លូវជាតិលេខ១ក្នុងទិសដៅពីភ្នំពេញទៅអ្នកលឿង។លុះមកដល់ចំណុចកើតហេតុដោយផ្លូវមានស្ថានភាពរាងកោងនិងជាតំបន់ស្ងាត់បណ្តាលឲ្យជនរងគ្រោះរេចង្កូតទៅជាមួយរថយន្តមិនស្គាល់ម៉ាក១គ្រឿងបើកបរបញ្ច្រាសទិសគ្នាបណ្តាលឲ្យដួលស្លាប់២នាក់នៅកន្លែងកើតហេតុរបួសធ្ងន់ម្នាក់ដឹកយកទៅសង្គ្រោះនៅមន្ទីរពេទ្យមិត្តភាពខ្មែរ-សូវៀត ចំណែក រថយន្តបើកគេចបាត់។
ក្រោយកើតហេតុសមត្ថកិច្ចទាក់ទងទៅក្រុមគ្រួសារនៅស្រុកកំណើតដើម្បីយកសាកសពទៅរៀបចំធ្វើបុណ្យតាមប្រពៃណី៕ សណ្តោស
