សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មនុស្សប្រុសស្រី ៣នាក់ដែលជាប់ពាក់ព័ន្ធនឹងថ្នាំញៀន ត្រូវបានសមត្ថកិច្ចខណ្ឌឬស្សីកែវ ធ្វើការបង្ក្រាបជាក់ស្តែងនៅម្តុំផ្លូវរថភ្លើង ហេីយបានដកហូតថ្នាំញៀនចំនួន ១២កញ្ចប់ កាលពីវេលាម៉ោង ៥និង១០នាទីល្ងាច ថ្ងៃទី១០ ខែមករា ឆ្នាំ២០១៧ នៅតាមបណ្តោយផ្លូវលេខ៧០កែងផ្លូវរថភ្លើង ស្ថិតក្នុងក្រុម៩ ភូមិទួលសង្កែ សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ។
សមត្ថកិច្ចឲ្យដឹងថា ជនសង្ស័យទាំង ៣នាក់ ទី១-ឈ្មោះ ប៉ែន ភា ភេទស្រី អាយុ ២៦ឆ្នាំ មុខរបរ មិនពិតប្រាកដ, ទី២-ឈ្មោះ ឡាយ ហេងហួត ភេទប្រុស អាយុ ២៩ឆ្នាំ មុខរបរ មិនពិតប្រាកដ និងទី៣-ឈ្មោះ ប្រាក់ ដារ៉ាន់ ហៅដារ៉ា ភេទប្រុស អាយុ ៣៤ឆ្នាំ មុខរបរ បើកបររថយន្តរោងចក្រ រ៉ូស៉ីង បច្ចុប្បន្នអ្នកទាំង ៣នាក់មានទីលំនៅផ្ទះជួល ផ្លូវរថភ្លើង ក្រុម៩ ភូមិទួលសង្កែ សង្កាត់ទួលសង្កែ ខណ្ឌឬស្សីកែវ។
សមត្ថកិច្ចបានបន្តទៀតថា នៅក្នុងប្រតិបត្តិការនេះ សមត្ថកិច្ចយើងបានធ្វើការស្រាវជ្រាវ និងកំណត់មុខសញ្ញារហូតឈានដល់ការបង្ក្រាបករណីជួញដូរ និងចែកចាយគ្រឿងញៀន ដែលស្ថិតនៅតាមបណ្តោយផ្លូវរថភ្លើង ហើយឃាត់ខ្លួនជនសង្ស័យប្រុសស្រី ៣នាក់ និងដកហូតម្សៅក្រាមពណ៌សថ្លា ចំនួន ១២កញ្ចប់ ហើយសមត្ថកិច្ចយើងបាននាំជនសង្ស័យខាងលើទៅកាន់ប៉ុស្តិ៍នគរបាលទួលសង្កែ ដើម្បីសួរនាំ។
បច្ចុប្បន្នជនសង្ស័យទាំង ៣នាក់ខាងលើ រួមនឹងវត្ថុតាង ត្រូវសមត្ថកិច្ចឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌឬស្សីកែវ ដើម្បីកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់។
រយៈពេលថ្មីៗនេះបន្ទាប់ពីមានបទបញ្ជាពីថ្នាក់លេីគេបានសង្កេតឃើញថាសមត្ថកិច្ចទាំងនគរបាលនិងអាវុហត្ថស្រាវជ្រាវបង្រ្កាបករណីគ្រឿងញៀននេះទូទាំងប្រទេស ៕ អរុណរះ
