សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មំុ៖ រថយន្តដឹកឈើគ្រាក់គ្រញូងគ្មានច្បាប់១គ្រឿង ត្រូវបានកម្លាំងនគរបាលសេដ្ឋកិច្ចខេត្តត្បូងឃ្មំុ ចាប់ឃាត់បានបន្ទាប់ពីអ្នកបើកបរបម្រុងដឹកយកទៅលក់នៅប្រទេសវៀតណាមរបៀបលោតឆត្រ ។
ការដេញបង្រ្កាបរថយន្តខាងលើធ្វើឡើងនៅយប់ថ្ងៃទី៨ ខែកុម្ភៈ ឆ្នាំ២០១៧ នៅលើផ្លូវជាតិលេខ៨ ត្រង់ចំណុច ភូមិ_ឃំុក្រែក ស្រុកពញាក្រែក ខេត្តត្បូងឃ្មំុ ។
លោកវរសេនីយ៍ត្រី ឡេង ចន្រ្តា អានុប្រធានការិយាល័យនគរបាលប្រឆាំងបទល្មើសសេដ្ឋកិច្ច និងជាប្រធានគោលដៅចំណុចខាងលើបានឲ្យដឹងក្នុងកំណត់ហេតុថា ករណីនេះ រថយន្តល្មើស ម៉ាកឆ្លាម ពណ៌ទឹកប្រាក់ ស្លាកលេខ 2S_5948 ដឹកជញ្ជូនដោយជនសង្ស័យ ឈ្មោះ ហេង រ៉ាវុធ ប្រុ អាយុ ៤០ឆ្នាំ រស់នៅភូមិសែនជ័យ ឃំុស្រអែម ស្រុកជាំក្សាន ខេត្តព្រះវិហារ ហើយជំនាញបានឆែករកឃើញឈើគ្រញូងចំនួន១៦៥ ដំុដែលជនសង្ស័យដឹកយកមកពីខេត្តព្រះវិហាបម្រុងលួចឆ្លងដែនទៅលក់នៅប្រទេសវៀតណាម។
បច្ចុប្បន្នវត្ថុតាង និងជនសង្ស័យត្រូវបានប្រគល់ទៅជំនាញរដ្ឋបាលព្រៃឈើបន្តនិតិវិធី៕ វណ្ណះ
