សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ កម្លាំងកងរាជអាវុធហត្ថខេត្តពោធិ៍សាត់ សហការជាមួយកម្លាំងកម្លាំងមូលដ្ឋានកងរាជអាវុធហត្ថស្រុកបាកាន ឃាត់ខ្លួនជនសង្ស័យចោរលួចកគោចំនួន ០៣នាក់ រួមទាំងវត្ថុតាងសត្វគោ ០១ក្បាល បន្ទាប់ពីទទួលបណ្ដឹងពីប្រជាពលរដ្ឋម្នាក់ជាម្ចាស់សត្វគោ ដើម្បីបន្តនីតិវិធី។
ប្រតិបត្តិការនេះអនុវត្តន៍ឡើងនៅវេលាម៉ោង ១៦និង៣០នាទី ថ្ងៃទី០៨ ខែកុម្ភៈ ឆ្នាំ២០១៧ ស្ថិតក្នុងភូមិនិគមន៍ ឃុំស្វាយដូនកែវ ស្រុកបាកាន ខេត្តពោធិ៍សាត់ ។
ប្រភពព័ត៌មានពីកម្លាំងមូលដ្ឋានកងរាជអាវុធហត្ថស្រុកបាកាន បានឱ្យដឹងថា ជនសង្ស័យទាំង ០៣នាក់ ត្រូវបានកម្លាំងឃាត់ខ្លួនទី១-ឈ្មោះ ស សិត ភេទប្រុស អាយុ២១ឆ្នាំ ជនជាតិខ្មែរ បច្ចុប្បន្នរស់នៅភូមិ-ឃុំអូរតាប៉ោង ស្រុកបាកាន (អ្នកលួច) ទី២-ឈ្មោះ ថង ចាន់ថន ភេទប្រុស អាយុ ៣៥ឆ្នាំ ជនជាតិខ្មែរ បច្ចុប្បន្នរស់នៅភូមិនិគមន៍ ឃុំស្វាយដូនកែវ ស្រុកបាកាន និងទី៣-ឈ្មោះ ខុន នី ភេទប្រុស អាយុ ៣២ឆ្នាំ ជនជាតិខ្មែរបច្ចុប្បន្នរស់នៅភូមិកំពោតអាង ឃុំស្វាយដូនកែវ ស្រុកបាកាន អ្នកទាំងពីរនាក់នេះជាអ្នកទទួលផល (ទិញតម្លៃ ២លានរៀល) ។
ប្រភពខាងលើបន្តថា ក្នុងកិច្ចប្រតិបត្តិការបង្រ្កាបជនសង្ស័យទាំង ០៣នាក់ រួមទាំងវត្ថុតាងសត្វគោចំនួន ០១ក្បាល ហើយការឃាត់នេះធ្វើឡើងក្រោយទទួលបណ្ដឹងរបស់ឈ្មោះ ញ៉ែម ញឹប ភេទប្រុស អាយុ ៤៨ឆ្នាំ ជនជាតិខ្មែរ បច្ចុប្បន្នរស់នៅភូមិរំចេក ឃុំត្រពាំងជង ស្រុកបាកាន ក្នុងពាក្យបណ្ដឹងបានរៀបរាប់ថា បានបាត់គោឈ្មោល ០១ក្បាល សំបុរស អាយុ ១១ខែ ពីចំណងក្បែរផ្ទះកាលពីព្រឹកថ្ងៃទី០៧ ខែកុម្ភៈ ឆ្នាំ២០១៧ ស្រាប់តែប្រទះឃើញនៅផ្ទះជនសង្ស័យ ក៏បានរាយការណ៍ និងប្ដឹងមកកងកម្លាំងសមត្ថកិច្ចកងរាជអាវុធហត្ថតែម្ដង។
ប្រភពខាងលើបន្តទៀតថា ចំពោះវត្ថុតាងសត្វគោឈ្មោល ០១ក្បាលបានប្រគល់ឱ្យម្ចាស់ ដោយមានសាក្សី អាជ្ញាធរ មានសមត្ថកិច្ចដឹងឮត្រឹមត្រូវ ចំណែកជនសង្ស័យធ្វើសកម្មភាពលួច និងទទួលផលទិញ កំពុងបន្តនីតិវិធីនៅទីបញ្ជាការដ្ឋានកងរាជអាវុធហត្ថខេត្តពោធិ៍សាត់ ដើម្បីបញ្ជូនទៅសាលាដំបូងខេត្តពោធិ៍សាត់ ចាត់ការបន្ត ៕ ប៉ឹម ពិន
