រថយន្តដឹកទឹកកកអនាម័យ ស៊ុបភឺអាយ បើកបុករះទូដែក និងជញ្ជាំងរបងផ្ទះគេបាក់អស់មួយផ្ទាំង សង្ស័យអ្នកបើកបរងងុយដេក

ភ្នំពេញ៖ រថយន្តកូរ៉េដឹកទឹកកកអនាម័យ ស៊ុបភឺអាយ១គ្រឿង បានបោះពួយទៅបុករេះទូដែកដែលគេធ្វើសំរាប់ដាកលក់បារី និងបណ្តាលឲ្យបាក់ជញ្ជាំងរបងផ្ទះគេអស់មួយផ្ទាំង សង្ស័យអ្នកបើកបរងងុយដេក ។

ហេតុការណ៍នេះ បានកើតឡើងកាលពីវេលាម៉ោង១២និង៣៥នាទី​ថ្ងៃទី២ ខែឧសភា ឆ្នាំ២០១៧ នៅចំណុចមុខផ្ទះធ្វើទូដែកសម្រាប់លក់ តាមបណ្តោយផ្លូវ១៩៥៨ភូមិទំនប់ សង្កាត់ភ្នំពេញថ្មី ខណ្ឌសែនសុខ។

នៅមុនពេលកើតហេតុ រថយន្តក៉ូរ៉េ ម៉ាកហុីយ៉ាន់ដាយ ពណ៌ស ពាក់ស្លាកលេខ ភ្នំពេញ 2AL8914 ដែលមានដឹកទឹកកក ហុីហោ ស៊ុបភឺអាយ បើកបរដោយបុរសម្នាក់ឈ្មោះ ជា វិចិត្ត អាយុ២១ឆ្នាំ ក្នុងទិសដៅពីកើតទៅលិច លុះមកដល់ចំណុចកើតហេតុ ស្រាប់តែរថយន្តនោះបានរ៉េចង្កូតមកខាងឆ្វេងដៃ ទៅបុករះទូដែកខូតខាតអស់៧ទូ ហើយជ្រុលទៅបុកជញ្ជាំងផ្ទះគេបាក់អស់៤ម៉ែត្រ ទើបរថយន្តទៅមុខលែងរួច តែមិនមានអ្នករបួសនោះទេ។

នគរបាលចរាចរណ៍ខណ្ឌសែនសុខថា គ្រោះថ្នាក់នេះមកពីអ្នកបើកបរងងុយដេកមួយផាំង។ អ្នកបើកបរបានទំនាក់ទំនងទៅថៅកែមកដោះស្រាយសងសំណងទៅភាគីរងគ្រោះ(ម្ចាស់របស់)ដើម្បីបញ្ចប់រឿង៕ តុង សីហា