សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានករណីគ្រោះថ្នាក់ចរាចរណ៍គួរឲ្យហួសចិត្តមួយ បានកើតឡើងរវាងម៉ូតូ នឹងម៉ូតូបុកបញ្ច្រាសគ្នា ខណៈកំពុងជជែករកខុសត្រូវ ស្រាប់តែមានរថយន្តហាយឡែនឌ័រកិនពីលើម៉ូតូហុងដា សេ១៥ សេរី២០១៧ បន្ថែមទៀត បណ្ដាលឲ្យកកស្ទះកាលពីវេលាម៉ោង៤និង១០នាទីរសៀល ថ្ងៃទី៣ ខែឧសភា ឆ្នាំ២០១៧ ស្ថិតក្នុងភូមិស្រះវង្ស សង្កាត់ស្វាយរៀង ក្រុងស្វាយរៀង ទល់មុខសាលាដំបូងខេត្តស្វាយរៀង។
យោងតាមសាក្សីបានឲ្យដឹងថា មុនកើតហេតុ មានម៉ូតូហុងដា សេ១២៥ សេរី២០១៧ ពណ៍ខ្មៅ អត់ស្លាកលេខ បើកបរដោយបុរសម្នាក់មិនស្គាល់ឈ្មោះ មានអាយុ៤០ឆ្នាំ ធ្វើដំណើរពីត្បូងមកជើងទល់មុខសាលាដំបូងខេត្តស្វាយរៀង ស្រាប់តែមានម៉ូតូម៉ាក zoomer ពណ៍ស លាយខ្មៅអត់ស្លាកលេខ បើកដឹកគ្នា២នាក់ ទិសដៅបញ្ច្រាសគ្នា ពីជើងមកត្បូង បុកយ៉ាងពេញទំហឹងបណ្ដាលឲ្យម៉ូតូទាំង២ខូចខាតយ៉ាងដំណំ ។
ក្រោយកើយហេតុ ប្រជាពលរដ្ឋ និងអ្នកធ្វើដំណើរឈប់ចោមរោមមើលយ៉ាងច្រើនកកកុញ ដោយភាគីម្នាក់ៗនិយាយយកត្រូវរៀងៗខ្លួន ប៉ុន្តែអ្វីដែលហួសចិត្ត ស្រាប់តែមានរថយន្តម៉ាកហាយឡែនឌ័រមិនមានស្លាកលេខ ពណ៍កណ្ដុរល្មែះ ធ្វើដំណើរពីជើងមកត្បូង កិនបន្ថែមពីលើម៉ូតូហុងដា សេ១២៥ សេរី ២០១៧ ទៀតបណ្ដាលឲ្យខូចខាតយ៉ាងដំណំ ចំណែកអ្នកបើករថយន្តបានជិះចេញធ្វើមិនដឹង ។
ក្រោយមកសមត្ថកិច្ចនគរបាលចរាចរណ៍ក្រុងស្វាយរៀងបានមកវាស់វែងដើម្បីចាត់ការតាមច្បាប់ ៕ យឹម សុថាន
