ចោរឆក់កាបូបស្ទើររាល់ថ្ងៃនៅភ្នំពេញ សមត្ថកិច្ចបង្រ្កាបមិនឈ្នះ

ភ្នំពេញ: ប្រជាពលរដ្ឋរស់នៅក្នុងទីក្រុងភ្នំពេញ ក៏ដូចជានៅបណ្តាខេត្តមួយចំនួន នាពេលបច្ចុប្បន្ននេះមានការភ័យខ្លាចយ៉ាងខ្លាំងចំពោះសកម្មភាព ចោរលួច ចោរឆក់ ចោរប្លន់ដែលកំពុងកើតមានស្ទើររាល់ថ្ងៃ។ដោយឡែកសកម្មភាពចោរឆក់កាបូប ឬទូរស័ព្ទ ក៏ ជាប្រធានបទមួយសំខាន់ដែលគួរឲ្យចាប់អារម្មណ៍ ព្រោះសកម្មភាពទាំងនេះក្រៅពីធ្វើឲ្យជនរងគ្រោះបាត់បង់សម្ភារៈលុយកាក់និងគ្រឿងអលង្ការ គឺនៅបានធ្វើឲ្យពួកគាត់ក្លាយជាជនពិការ ឬឈានដល់បាត់បង់ជីវិតក៏មាន ដោយសារចោរឆក់បណ្តាលឲ្យដួលម៉ូតូបោកក្បាលនឹងថ្នល់ឬរថយន្តកិន។សកម្មចោរកម្មឆក់តាមផ្លូវសាធារណៈទាំងនោះហាក់មិនអន់ថយសោះ បើទោះបីជាកម្លាំងសមត្ថកិច្ចនៅតាមមូលដ្ឋានព្យាយាមបង្ក្រាបយ៉ាងសកម្មក៏ដោយ។

ជាក់ស្តែងកាលពីថ្ងៃទី២៥ ខែឧសភា ឆ្នាំ២០១៧ កាមេរ៉ាសុវត្ថិភាពបំពាក់ជាប់នៅក្នុងរថយន្តអ្នកធ្វើដំណើរតាមផ្លូវម្នាក់បានថតរូបទាំងស្រុងនូវសកម្មភាពចោរឆក់កាបូបពីស្ត្រីវ័យចំណាស់ម្នាក់នៅតាមដងផ្លូវទល់មុខវិទ្យាល័យ ជាស៊ីម សន្ធរម៉ុក បណ្តាលឲ្យស្ត្រីរងគ្រោះដួលបោកនឹងថ្នល់រងរបួសស្ទើរក្រោកមិនរួច ហើយត្រូវបានបងប្អូនអ្នកជិតខាងជួយសង្រ្គោះយ៉ាងយូរទើបដឹងខ្លួន។

នៅក្នុងកាមេរ៉ាសុវត្ថិភាពនោះបានបង្ហាញឲ្យឃើញថា ស្រ្តីរងគ្រោះជិះម៉ូតូតែម្នាក់ឯង ដោយដាក់កាបូបលុយព្យួរនឹងដៃម៉ូតូខាងមុខប៉ែកខាងស្តាំ។ លុះជិះមកដល់មុខវិទ្យាល័យ ជាស៊ីម សន្ធរម៉ុកក្នុងសង្កាត់ទឹកល្អក់១ ខណ្ឌទួលគោក មានជនសង្ស័យម្នាក់ជិះម៉ូតូពាក់ស្លាកលេខកំពត 1H-8059 តាមពីក្រោយរួចធ្វើសកម្មភាពឆក់យកកាបូបដៃបានសម្រេច បណ្តាលឲ្យស្រ្តីរងគ្រោះដួលម៉ូតូសន្លប់នៅនឹងកន្លែងគួរឲ្យអាណិត ឯជនសង្ស័យគេចខ្លួនបាត់ដោយសុវត្ថិភាព ។

ដូច្នេះសូមបងប្អូនប្រជាពលរដ្ឋទាំងអស់ដែលរស់នៅក្នុងរាជធានីភ្នំពេញឬតាមបណ្តាខេត្តនានា សូមមេត្តាប្រុងប្រយ័ត្នក្នុងពេលធ្វើដំណើរកុំស្ពាយ ឬដាកកាបូបប្រហែស ដើម្បីចៀសវាងមានអំពើបែបនេះកើតឡើង។

ប្រជាពលរដ្ឋចង់សួរថា បើស្គាល់ស្លាកលេខម៉ូតូជនសង្ស័យបានហើយ តើសមត្ថកិច្ចអាចស្រាវ ជ្រាវរកមុខជនសង្ស័យឃើញទេ ៕ ប្រាថ្នា