សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ស្ត្រីម្នាក់បានរងរបួសធ្ងន់ធ្ងរ ខណៈជិះម៉ូតូហើយត្រូវបានក្រុមជនសង្ស័យដៃស្អិត បានធ្វើសកម្មភាពឆក់កាបូបស្ពាយបានសម្រេច ហើយគេចខ្លួនបាត់ដោយមិនរំខានដល់សមត្ថកិច្ច។
ហេតុការណ៍នេះ បានកើតឡើងកាលពីវេលាម៉ោងរំលងអធ្រាត្រ ឈានចូលថ្ងៃទី៩ ខែមិថុនា ឆ្នាំ២០១៧ នៅចំណុចផ្លូវលេខ១១៨ កែងផ្លូវនរោត្តម ស្ថិតក្នុងសង្កាត់ផ្សារចាស់ខណ្ឌដូនពេញ។
តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញស្រ្តីម្នាក់ជិះម៉ូតូម៉ាក អាយខុន ពណ៌ស ពាក់ស្លាកលេខ ភ្នំពេញ 1X8626 ធ្វើដំណើរតាមបណ្តោយផ្លូវនរោត្តម ក្នុងទិសដៅពីត្បូងទៅជើង ខណៈមកដល់ចំណុចកើតហេតុ ស្រាប់តែមានជនសង្ស័យមានគ្នា៣ម៉ូតូ មកពីក្រោយធ្វើកម្មភាពឆក់កាបូបស្ពាយបានសម្រេច បណ្តាលឲ្យជនរងគ្រោះដួលបោកក្បាលនឹងថ្នល់រងរបួសធ្ងន់។
ក្រោយពេលកើតហេតុ ជនរងគ្រោះត្រូវបានរថយន្តសង្គ្រោះដឹកយកទៅមន្ទីរពេទ្យភ្លាមៗ ចំណែកម៉ូតូត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលរដ្ឋបាលផ្សារចាស់ ដើម្បីរង់ចាំបងប្អូនមកទទួលយកទៅផ្ទះវិញ៕ សុខាសែនជ័យ
