សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ពិតជាចៃដន្យណាស់គ្រាដែលប្រពន្ធវ័យក្មេងស្រស់ស្អាតម្នាក់បានជិះម៉ូតូជាមួយបុរសផ្សេងទាំង កណ្តាលអធ្រាត្រ ហើយប្តីបានជួបនៅពាក់កណ្តាលផ្លូវ កើតមានភ្លើងប្រចណ្ឌរាប់រយអង្សាទ្រាំ លែងបានក៏បើករថយន្តបំបុកបណ្ដាលឲ្យប្រពន្ធរងរបួសធ្ងន់ ហើយរថយន្តបានរេចង្កូតបន្ដទៅបុក របងទ្វារផ្ទះ Wing បណ្ដាលឲ្យបាក់រងការ ខូចខាតស្ទើរទាំងស្រុង ផ្អើលទាំងកណ្តាលយប់។
ហេតុការណ៍គួរឲ្យភ្ញាក់ផ្អើលនេះកើតឡើងកាលពីវេលាម៉ោង១ និង ៤០ នាទីយប់ឈានចូលថ្ងៃទី ១០ ខែ មិថុនា ឆ្នាំ២០១៧ នៅត្រង់ចំណុចផ្ទះ Wing សុបញ្ញា តាមបណ្ដោយផ្លូវ ២៧៣ សង្កាត់បឹងកក់១ ខណ្ឌទួលគោក។
តាមប្រជាពលរដ្ឋដែលឃើញ ហេតុការណ៍នោះបានឲ្យដឹងថា មុនពេលកើតហេតុ គេឃើញ បុរសនារី ២ នាក់មានវ័យជាង២០ឆ្នាំបានជិះម៉ូតូ ហុងដាឌ្រីមសេ ១២៥ មិនចាំស្លាកលេខ ពណ៌ខ្មៅមួយគ្រឿងធ្វើដំណើរតាមបណ្តោយផ្លូវលេខ២៧៣ ពីលិចទៅកើត។ ខណៈមកដល់ចំណុចកើតហេតុក៏មានបុរសម្នាក់វ័យស្របាលគ្នានឹងបុរសបើកម៉ូតូបានបើករថយន្ដកាមរីបាឡែន ពណ៌ស្ករ ពាក់ ស្លាកលេខ ភ្នំពេញ 2AG -7863 ធ្វើដំណើរ ស្របគ្នា ក៏បានបុកពីក្រោយ ម៉ូតូបណ្ដាលឲ្យនាងជាប្រពន្ធរងរបួសធ្ងន់ហើយរថយន្តមិនទាន់អស់ល្បឿនក៏រេចង្កូតទៅបុករបងទ្វារផ្ទះWing បណ្ដាលឲ្យបាក់រងការខូចខាតស្ទើរទាំងស្រុងតែម្តង ។ ករណីនេះធ្វើឲ្យស្រ្តីជាប្រពន្ធរបស់អ្នកបើកបររថយន្តរលាត់ដៃនិងជង្គង់រងរបួសធ្ងន់គួរសមត្រូវបានអ្នកជិតខាង ហៅរ៉ឺម៉កម៉ូតូដឹកទៅមន្ទីរពេទ្យ គ្រាដែលប្តីកំពុងមានកំហឹងដោយភ្លើងប្រចណ្ឌ។ចំណែកបុរសដែលជិះម៉ូតូឌុបប្រពន្ធរបស់គេនោះបានរងរបួសស្រាល រួចក៏ប្រញាប់ប្រញាល់លើកម៉ូតូជិះរត់គេចខ្លួនបាត់ស្រមោលទៅ។
លោក ហម គា នាយនគរបាលប៉ុស្តិ៍បឹងកក់១ បានប្រាប់នគរវត្តតាមទូរស័ព្ទថា ពិតជាម ានហេតុការណ៍នេះកើតឡើងនៅចំណុចខាងលើប្រាកដមែន។ នៅពេលដែលកម្លាំងរបស់លោកទៅដល់ ភាគីបង្កទាំង៣នាក់បានចាកចេញពីកន្លែងកើតហេតុអស់ហើយដោយបន្សល់រថយន្តបង្កនៅកន្លែងកើតហេតុត្រូវបានកម្លាំងនគរបាលចរាចរ យកទៅរក្សាទុក នៅអធិការដ្ឋាននគរបាលខណ្ឌទួលគោករង់ចាំដោះស្រាយជាមួយម្ចាស់ផ្ទះវីង ដែលទាមទារ សំណង៣០០ដុល្លារ។
លោក ហម គា បញ្ជាក់ថា ក្នុងករណីនេះលោកមិនដឹងថាកើតឡើងដោយសារអ្វីនោះទេ តែបើតាមការបំភ្លឺពីអ្នកឃើញហេតុការណ៍ប្រាប់លោកថា កើតឡើងដោយសារភាគីបុរស បើករថយន្តប្រចណ្ឌសង្សារជិះម៉ូតូជាមួយបុរសផ្សេង ទើបបុរសនេះបើករថយន្តបំបុក៕ ប្រាថ្នា
