សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មនុស្ស២នាក់បានរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍រថយន្តដឹកទឹកបរិសុទ្ធបុកជាមួយរថយន្តដឹកដី ហើយជនរងគ្រោះត្រូវបានគេដឹកមកកាន់មន្ទីរពេទ្យបង្អែកខេត្តដើម្បីសង្គ្រោះភ្លាមៗ ពេលមេឃកំពុងភ្លៀងផងនោះ។
ហេតុការណ៍បានកើតឡើងនៅលើកំណាត់ផ្លូវលេខ១ កាលពីរសៀលវេលាម៉ោង៤និង២០នាទី ថ្ងៃទី១៣ ខែមិថុនា ឆ្នាំ២០១៧ ស្ថិតក្នុងភូមិស្វាយតឿ សង្កាត់ស្វាយតឿ ក្រុងស្វាយរៀង ខេត្តស្វាយរៀង ខណៈរថយន្តបើកបរទិសដៅបញ្ច្រាសគ្នា ។
សមត្ថកិច្ចក្រុងស្វាយរៀងថា រថយន្តម៉ាកម៉ុងគោ ពណ៌ស គ្មានស្លាកលេខ បើកបរដោយឈ្មោះ ប្រាក់ សារិន អាយុ៣២ឆ្នាំ ភេទប្រុស(មុខរបរបើកបរ) រស់នៅភូមិចុងព្រែក សង្កាត់ស្វាយរៀង ក្រុងស្វាយរៀង ដោយមាន អ្នករួមដំណើរឈ្មោះ កែន សាម៊ីុ អាយុ ១៨ ឆ្នាំ ភេទប្រុស(មុខរបរកម្មករ) នៅភូមិតាជៃ ឃុំកំពង់ចំឡង ស្រុកស្វាយជ្រំ និងឈ្មោះ សេក សុវណ្ណដា អាយុ១៨ ឆ្នាំ ភេទប្រុស (មុខរបរកម្មករ) នៅភូមិក្រញូង ឃុំរមាំងថ្កោល ស្រុកស្វាយទាប ដោយធ្វើដំណើរពីកើតមកលិច ស្របពេលនោះមេឃកំពុងភ្លៀងធ្លាក់យ៉ាងខ្លាំង ហើយស្រាប់តែមាន រថយន្តម៉ាក ហ៊ីុយ៉ានដាយ ពណ៌ទឹកប្រាក់ ស្លាកលេខ ភ្នំពេញ ៣D.៩៦៦៨ បើកបរដោយបុរសម្នាក់មិនស្គាល់ឈ្មោះ ដែលបើកបញ្ច្រាសទិសគ្នាពីលិចទៅកើត មិនដឹងយ៉ាងម៉េច ក៏បុកគ្នាពេញទំហឹងលាន់សូរដូចរន្ទះបណ្ដាលឲ្យព្រូរថយន្តរងរបួសធ្ងន់២នាក់គៀបជាប់កាប៊ីនខាងមុខ។
ក្រោយមកអ្នកភូមិ ក៏ដូចជាអ្នកធ្វើដំណើរនាំគ្នារាយការណ៍មកសមត្ថកិច្ច និងជួយយកមនុស្សចេញពីក្នុងរថយន្ត ដើម្បីសង្គ្រោះ រីឯអ្នកបើករថយន្តទាំង២បានរត់គេចខ្លួនភ្លាមៗផងដែរ។
ចំពោះវត្ថុតាងទាំង២គ្រឿង សមត្ថកិច្ចនគរបាលបានវាស់វែង និងអូសមក រក្សាទុកនៅការិយាល័យនគរបាលចរាចរណ៍ខេត្តស្វាយរៀងចាត់ការបន្តតាមច្បាប់។
សមត្ថកិច្ចនគរបាលបញ្ជាក់ថា មូលហេតុដោយសារតែ រថយន្តម៉ាក ម៉ុងគោដឹកទឹកសុទ្ធបើកបរ មិនប្រកាន់ស្តាំ ទើបជួបគ្រោះថ្នាក់ចរារចណ៍នេះកើតឡើង ៕ យឹម សុថាន
