សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័ម្នាក់ ត្រូវកម្លាំងនគរបាលព្រហ្មទណ្ឌខណ្ឌសែនសុខ ឆ្មក់បង្ក្រាប និងឃាត់ខ្លួនដោយចោទពីបទជួញដូរ និងប្រើប្រាស់គ្រឿងញៀន ដោយដកហូតថ្នាំញៀនចំនួន៨កញ្ចប់ ឧបករណ៍ប្រើប្រាស់មួយចំនួន។
កាលពីវេលាម៉ោង៩និង៤០នាទីពព្រឹក ថ្ងៃទី៣០ ខែមិថុនា ឆ្នាំ២០១៧ នៅចំណុចផ្ទះសង់ថ្មី ភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ។
សមត្ថកិច្ចបានឲ្យដឹងថា ជនសង្ស័យមានឈ្មោះ មាស វិសាល ភេទប្រុស អាយុ២៥ឆ្នាំ មុខរបរមិនពិតប្រាកដ ស្នាក់នៅផ្ទះកើតហេតុខាងលើ និងមានស្រុកកំណើតភូមិសួង ឃុំសួង ស្រុកត្បូងឃ្មុំ ខេត្តកំពង់ចាម។
លោក គួក សុខហួ អធិការរងខណ្ឌសែនសុខតំណាងលោក ម៉ក់ ហុង អធិការនគរបាលខណ្ឌបានឲ្យដឹងថា មុននឹងឈានដល់ការបង្ក្រាបឃាត់ខ្លួនជនសង្ស័យខាងលើនេះ គឺដោយមានការស៊ើបអង្កេត និងស្រាវជ្រាវរបស់សមត្ថកិច្ចជំនាញទើបឃាត់ខ្លួនបានជនសង្ស័យម្នាក់នេះ។
ក្នុងនោះសមត្ថកិច្ចបានដកហូតវត្ថុតាងរួមមានថ្នាំញៀនចំនួន៨កញ្ចប់តូច និងឧបករណ៍សម្រាប់ប្រើប្រាស់នូវសារធាតុញៀនមួយចំនួន។
បច្ចុប្បន្នជនសង្ស័យរួមនិងវត្ថុតាងកំពុងឃាត់ខ្លួននៅអធិការដ្ឋាននគរបាលខណ្ឌសែនសុខដើម្បីចាត់ការតាមនីតិវិធីបន្ត៕ តុង សីហា
