សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង ៖ មនុស្សចំនួន៤នាក់ ត្រូវបានសមត្ថកិច្ចនគរបាលប្រឆាំងបទល្មើសគ្រឿងញៀន សហការជាមួយនឹងនគរបាលស្រុកកំពង់ត្រឡាច ឃាត់ខ្លួន ជាបន្តបន្ទាប់ ក្នុងពេលចុះប្រតិបត្តិការបង្រ្កាបករណីប្រើប្រាស់ ចែកចាយថ្នាំញៀន កាលពីរសៀលថ្ងៃទី៦ ខែសីហា ឆ្នាម២០១៧ នៅឃុំតាជេសស្រុកកំពង់ត្រឡាច ខេត្តកំពង់ឆ្នាំង ។
សមត្ថកិច្ចបានឲ្យដឹងថា ជនសង្ស័យដែលសមត្ថកិច្ចឃាត់ខ្លួននេះ ទីមួយឈ្មោះ កយ គុន ភេទប្រុស អាយុ៤៣ឆ្នាំ រស់នៅភូមិវត្តថ្មី ឃុំតាជេស ស្រុកកំពង់ត្រឡាច ខេត្តកំពង់ឆ្នាំង ២.ឈ្មោះ ផ្លុង សុភក្រ្ត័ ភេទប្រុស អាយុ២៣ឆ្នាំ រស់នៅឃុំតាជេស ស្រុកកំពង់ត្រឡាច ខេត្តកំពង់ឆ្នាំង ៣.ឈ្មោះ ទាំ កម្រី ភេទប្រុស អាយុ១៨ឆ្នាំ ជនជាតិខ្មែរ រស់នៅភូមិក្រសះថ្មី ឃុំឈូកស ស្រុកកំពង់ត្រឡាច ខេត្តកំពង់ឆ្នាំង ៤.ឈ្មោះយ៉ា សុខក្រី ភេទប្រុស អាយុ២២ឆ្នាំ រស់នៅភូមិក្រសះថ្មី ឃុំឈូកស ស្រុកកំពង់ត្រឡាច ខេត្តកំពង់ឆ្នាំង។
ក្នុងពេលឃាត់ខ្លួន សមត្ថកិច្ចបានដកហូត វត្ថុតាងមួយចំនួនមាន ថ្នាំញៀនចំនួន២កញ្ចប់(ធំ១កញ្ចប់) កាំភ្លើងខ្លី១ដើមម៉ាកK59 មានគ្រាប់ចំនួន៨គ្រាប់ ឧបករណ៏វិចខ្ចប់ថ្នាំញៀន និងឧបករសំរាប់ជក់ថ្នាំញៀនមួយចំនួនផងដែរ ។
សមត្ថកិច្ចបានឲ្យដឹងថា ក្រុមជនសង្ស័យទាំងនេះ គឺជាមុខសញ្ញា ដែលកំពុងតាមដានក្នុងរយៈកន្លងមកនេះ ជាមុខសញ្ញាដ៍សកម្មក្នុងការប្រើប្រាស់និងចែកចាយថ្នាំញៀន ។ ការចាប់ខ្លួនបាននេះគឺបន្ទាប់ពីកម្លាំងសមត្ថកិច្ចជំនាញ ទទួលបានព័តមានពីកម្លាំងសម្ងាត់ ស្តីពីសកម្មភាពរបស់ក្រុមជនសង្ស័យហើយបានដាក់កម្លាំងចុះព័ទ្ធចាប់បានតែម្តង។
ជនសង្ស័យទាំង៤នាក់ត្រូវបានសមត្ថកិច្ចនគរបាលខេត្តកំពង់ឆ្នាំង កសាងសំណុំរឿង បញ្ជូនទៅតុលាកាដើម្បីចាត់ការបន្តទៅតាមនីតិវិធី ៕ ចន្ថា
