សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម៖ សមត្ថកិច្ចចំរុះបញ្ជារឯកភាពស្រុកកោះសូទិន នៅព្រឹកថ្ងៃទី២៣ ខែកញ្ញា ឆ្នាំ២០១៧ បានចុះបង្ក្រាបបទល្មើសនេសាទ នៅចំណុចអតីត:ឡូត៌លេខ៨ ភូមិល្វេ ឃុំល្វេ ស្រុគោះសូទិន ខេត្តកំពង់ចាម។
ប្រតិបត្តិការនេះ លោកឩត្តមសេនីយ៍ត្រី ឯម កុសល ស្នងការនគរបាលខេត្តកំពង់ចាម បានចាត់តាំងបញ្ជាលោកវរសេនីយ៍ទោ ស្រេង ធារី នាយការិយាល័យនគរបាលប្រឆាំងបទល្មើសសេដ្ឋកិច្ចខេត្តកំពង់ចាម សហការជាមួយខណ្ឌរដ្ឋបាលជលផលខេត្តកំពង់ចាម, កំលាំងនគរបាលអធិការដ្ឋានស្រុកកោះសូទិន, អាវុធហត្ថស្រុកកោះសូទិន , សឹករងស្រុកកោះសូទិន ដឹកនាំដោយលោក ផេង សុផល អភិបាល នៃគណ:អភិបាលស្រុកកោះសូទិន។
ចំពោះវត្ថុតាងដកហូតបានរួមមាន លូស្បៃមុងចំនួន១២៥មាត់, របាំងស្បៃមុង ប្រវែង៥៦២៥ម៉ែត្រ, បង្គោលចម្រឹងឬស្សី ចំនួន២១២៥ដើម, ចាក់លែងកូនត្រីចំរុះ ចំនួន៥៧៥គីឡូក្រាម, ឩបករណ៍រ៉ាវ ចំនួន០៨មាត់, របាំងប្រវែង ៣៥០ម៉ែត្រ, បង្គោលឬស្សី ចំនួន១២០ដើម, ចាក់លែងកូនត្រីចំរុះ ចំនួន២៤គីឡូក្រាម, របាំងបិទផ្ចិតព្រែក ចំនួន០៥កន្លែង, បង្គោល ចំនួន១២០ដើម, របាំងព្រួលប្រវែង៩០ម៉ែត្រ,លបទ្រូ ចំនួន២០, ចាក់លែងកូនត្រីចំរុះចំនួន៣០គីឡូក្រាម់។
ឩបករណ៍ និងវត្ថុតាងមួយចំនួន បានកាប់បំផ្លាញចោលនៅនឹងកន្លែង និងមួយចំនួនទៀត យកមករក្សាទុកនៅសាលាស្រុកកោះសូទិន៕ ហេង សូរិយា
