សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ៣នាក់ត្រូវបានកម្លាំងនរបាលខណ្ឌពោធិ៍សែនជ័យឃាត់ខ្លួន និងបានឆែកឆេររកឃើញថ្នាំញៀនចំនួន៩កញ្ចប់ និងមធ្យោបាយធ្វើដំណើរម៉ូតូ១គ្រឿង។
ហេតុការណ៍ឃាត់ខ្លូនធ្វើឡើងនៅវេលាម៉ោង៩ និង៥០នាទីយប់ ថ្ងៃទី២៥ ខែកញ្ញា ឆ្នាំ២០១៧ ស្ថិតនៅចំណុចផ្លូវបេតុង(ម្តុំលក់សាច់ឆ្កែ) ក្នុងភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ។
តាមប្រភពព័ត៌មានពីកម្លាំងនគរបាលខណ្ឌពោធិ៍សែនជ័យម្នាក់បានឲ្យដឹងថា នៅមុនពេលឃាត់ខ្លួនជនសង្ស័យខាងលើ កម្លាំងនគរបាលមូលដ្ឋានបានចេញល្បាតចំនួន៤ម៉ូតូមានគ្នា៨នាក់។ លុះជិះមកដល់ចំណុចកើតហេតុខាងលើក៏ស្រាប់តែជួបជនសង្ស័យ៣នាក់ កំពុងអង្គុយនឹងឈរនៅក្បែរម៉ូតូ១គ្រឿង ម៉ាកធូដេ ពណ៌លឿង ពាក់ស្លាកលេខ ភ្នំពេញ 1GM-6406 តាមផ្លូវ។ ដោយមានការសង្ស័យទើបកម្លាំងបានឈប់សួរនាំ និងសុំត្រួតពិនិត្យឆែកឆេរ ស្រាប់តែឃើញក្រអប់មួយនៅក្បែរជើងជនសង្ស័យក៏រើសយកមកបើកមើលឃើញមានថ្នាំញៀនចំនួន៨កញ្ចប់ និងរកឃើញ១កញ្ចប់ទៀតខ្ចប់ក្រដាស់លុយ១រយរៀលសរុប៩កញ្ចប់។
ក្រោយពីរកឃើញវត្ថុតាង រួចកម្លាំងនគរបាលបាននាំខ្លួនជនសង្ស័យទៅសួរនាំនៅផ្នែកជំនាញតែម្តង។
បច្ចុប្បន្នជនសង្ស័យទាំង៣នាក់ រួមនឹងវត្ថុតាង ត្រូវបានបញ្ជូនទៅឲ្យផ្នែកជំនាញប្រឆាំងគ្រឿងញៀននៃអធិការដ្ឋាននគរបាលខណ្ឌពោធិ៍សែនជ័យដើម្បីចាត់ការបន្ត៕ សុខាសែនជ័យ
