សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មានករណីគ្រោះថ្នាក់ចរាចរណ៍មួយកើតឡើងរវាងរថយន្តម៉ាក Lexus RX330 ពណ៌ខ្មៅបានបុកជាមួយម៉ូតូ Zoomer X កាលពីវេលាម៉ោង ២និង៣០ នាទីយប់ឈានចូល ថ្ងៃទី២ ខែវិច្ឆិកា ឆ្នាំ២០១៧ ស្ថិតនៅតាមបណ្តោយផ្លូវសម្តេចសុធារស សង្កាត់ទន្លេបាសាក់ ខណ្ឌចំការមន រាជធានីភ្នំពេញ បណ្តាលឲ្យរបួសធ្ងន់ម្នាក់ និង របួសស្រាលពីរនាក់ ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ មានរថយន្ដមួយគ្រឿងម៉ាក Lexus RX 330 ពណ៌ខ្មៅ ពាក់ស្លាកលេខ ភ្នំពេញ 2S-6838 បើកបរ ដោយបុរសមិនស្គាល់ឈ្មោះម្នាក់ ធ្វើដំណើរតាមបណ្ដោយផ្លូវសម្តេចសុធារស ទិសដៅពីជើងទៅត្បូង។ ខណៈទៅដល់ចំណុចកន្លែងកើតហេតុ ក៏មានម៉ូតូមួយគ្រឿងម៉ាកហុងដា Zoomer X ពណ៌ក្រហម ពាក់ស្លាកលេខ សៀមរាប 1P-5610 ជិះដោយបុរស ២ នាក់និងនារីម្នាក់ ធ្វើដំណើតាមបណ្ដោយផ្លូវសម្តេចសុធារស ទិសដៅពីត្បូងទៅជើងត្រូវរថយន្តនោះបុកគ្នាយ៉ាងពេញទំហឹង បណ្ដាលឲ ភាគីខាងម៉ូតូ រងរបួសធ្ងន់បុរសម្នាក់ ត្រូវបានបញ្ចូនទៅមន្ទីរពេទ្យភ្លាមៗ និង២នាក់ទៀតរបួសស្រាល។ ចំណែកឯ ភាគីខាងរថយន្ដ មិនមានអ្នកណារងរបួសឡើយ គ្រាន់តែខូចរថយន្តតិចតួចប៉ណ្ណោះ ។
ក្រោយពេលកើតហេតុដោយសាតែភាគីទាំងសងខាង ដោះស្រាយគ្នាមិនត្រូវ ទើបសមត្ថកិច្ចជំនាញផ្នែក ចរាចរណ៍ខណ្ឌ ចុះទៅវាស់វែងយករថយន្ដនិងម៉ូតូខាងលើទៅរក្សាទុក នៅអធិការដ្ឋាននគរបាលខណ្ឌចំការមន ដើម្បីរង់ចាំដោះស្រាយគ្នានៅពេលក្រោយ៕ ប្រាថ្នា
