សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ ជាជនជាតិកូរ៉េ បានបើករថយន្តម៉ាកហាយឡេនឌឺ មួយគ្រឿងបញ្ច្រាសទិសដៅចរាចរណ៍ហើយ បានជ្រុលទៅបុកនារី២នាក់ជិះម៉ូតូវីវ៉ាទើបនឹងចេញពីធ្វើការ បណ្តាលឲ្យរងរបួសធ្ងន់ ត្រូវបញ្ជូនទៅកាន់មន្ទីរពេទ្យ ។ ហេតុការណ៍នេះកើតឡើងកាលពីវេលាម៉ោង ២និង១០នាទីរំលងអធ្រាត្រ ឈានចូលថ្ងៃទី១១ ខែវិច្ឆិកា ឆ្នាំ២០១៧ ស្ថិតនៅតាមបណ្តោយផ្លូវ សុធារស សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
បើតាមប្រភពព័ត៌មានពីកន្លែងបានឲ្យដឹងថា មុនពេលកើតហេតុគេឃើញនារី២នាក់ជិះម៉ូតូមួយគ្រឿងម៉ាកវីវ៉ា ពណ៌ក្រហម ពាក់ស្លាកលេខ ភ្នំពេញ 1V-2027 ឌុបគ្នា លុះមកដល់ចំណុចកើតហេតុ ស្រាប់តែបុរសជាជនជាតិកូរ៉េបានបើករថយន្តម៉ាកហាយឡេនឌឺ មួយគ្រឿង ពណ៌ទឹកមាស ពាក់ស្លាកលេខ ភ្នំពេញ 2AQ-7041 រួមដំណើរជាមួយមិត្តភក្តិជាជនជាតិកូរ៉េ៣នាក់ទៀត បើកបញ្ច្រាសទិសដៅចរាចរណ៍ ហើយបានជ្រុលទៅបុកនឹងម៉ូតូខាងលើ បណ្តាលឲ្យនារីទាំង២នាក់របួសធ្ងន់ត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅឯមន្ទីរពេទ្យ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ទាក់ទងទៅសមត្ថកិច្ចជំនាញចរាចរណ៍ឲ្យមកវាស់វែង និងយករថយន្តនិងម៉ូតូយកទៅរក្សាទុកនៅអធិការដ្ឋានគរបាលខណ្ឌចំការមនដើម្បីរង់ចាំដោះស្រាយគ្នា៕ ស រស្មី
