សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជនពីរនាក់ជិះម៉ូតូហុងដាឌ្រីមមួយគ្រឿង ក្នុងល្បឿនលឿនដូចហោះចាប់ហ្វ្រាំងមិនទាន់ ក៏ជ្រុលទៅបុកឃឿនសួនច្បារ ពុះចែកទ្រូងផ្លូវបណ្តាលឲ្យរងរបួសធ្ងន់ទាំង២នាក់ខណៈមេឃកំពុងមានធ្លាក់ភ្លៀងផងនោះ។
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោងកណ្តាលអធ្រាត្រ ថ្ងៃទី១៥ ខែវិច្ឆិកា ឆ្នាំ២០១៧ ត្រង់ចំណុចផ្លូវភ្នំពេញ ហាណូយ កែងនឹងផ្លូវឧកញ្ញាម៉ុងរិទ្ធី ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
អ្នកឃើញហេតុការណ៍បានឲ្យដឹងថា នៅមុនពេលកើតហេតុ គេឃើញយុវជនពីរនាក់បើកបរម៉ូតូមួយគ្រឿងម៉ាក ហុងដាឌ្រីមសេ១២៥ សេរីឆ្នាំ២០១៦ ពណ៌ខ្មៅ ពាក់ស្លាកលេខកំពត 1J-4419 ដោយធ្វើដំណើរតាមបណ្តោយផ្លូវភ្នំពេញ ហាណូយ ក្នុងទិសដៅពីត្បូងទៅជើង។ លុះមកដល់ចំណុចកើតហេតុ សង្ស័យស្ថានភាពផ្លូវរអិល ខណៈមានភ្លៀងធ្លាក់ផងនោះ អ្នកបើកបរចាប់ហ្វ្រាំងមិនទាន់ ក៏រេចង្កូតទៅខាងឆ្វេងទៅបុកនឹងឃឿនសួនច្បារ ពុះចែកទ្រូងផ្លូវបណ្តាលឲ្យដួលម៉ូតូរងរបួសធ្ងន់ធ្ងរទាំងពីរនាក់ ហើយត្រូវបានរថយន្តសង្គ្រោះដឹកបញ្ជូនទៅសង្គ្រោះនៅមន្ទីរពេទ្យកាល់ម៉ែតភ្លាមៗ ចំណែកម៉ូតូរងការខូចខាតតិចតួច។
ក្រោយពេលកើតហេតុ នគរបាលជំនាញផ្នែកចរាចរណ៍បានចុះមកវាស់វែង និងយកម៉ូតូទៅរក្សានៅអធិការដ្ឋាននគរបាលខណ្ឌសែនសុខដើម្បីរង់ចាំសាច់ញាតិមកយកទៅវិញនៅពេលក្រោយ៕ តុង សីហា
