សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តម៉ាកហាយឡែនឌ័រមួយគ្រឿ ងបើកមកបុកម៉ូតូមួយគ្រឿងម៉ាកអាយខនពេញទំហឹង បណ្តាលឲ្យដួលខ្ទាតចូលទៅក្រោមរថយន្តមួយគ្រឿងទៀតបណ្ដោលឲ្យបុរសម្នាក់បានរងរបួសយ៉ាងធ្ងន់ ហើយម្ចាស់រថយន្តបង្កមិនព្រមឈប់ទេ បើករត់គេចខ្លួនបាត់ស្រមោល នៅបន្សល់ទុកស្លាកលេខមួយបន្ទះនៅនឹងកន្លែងកើតហេតុ។
ហេតុការណ៍នេះកើតឡើងកាលពីវេលាម៉ោង៤និង៣០នាទីល្ងាច ថ្ងៃទី ២៦ ខែ វិច្ឆិកា ឆ្នាំ ២០១៧ នៅចំណុចផ្លូវលេខ ៤៣២ កែងនិងផ្លូវលេខ ១៦៧ ក្នុងសង្កាត់ទួលទំពូងទី២ ខណ្ឌចំការមន រាជធានីភ្នំពេញ។
ជនរងគ្រោះមានឈ្មោះ ថន ពិសិដ្ឋ ភេទប្រុស អាយុ ២៤ឆ្នាំ មុខរបជាបុគ្គលិកក្រុមហ៊ុន ស្នាក់នៅផ្ទះលេខ ២៨ ផ្លូវលេខ ៤៤៦ ក្នុងសង្កាត់ទួលទំពូងទី១ ខណ្ឌចំការមន។
បើតាមប្រភពព័ត៌មានពីសមត្ថកិច្ចបានប្រាប់ឲ្យដឹងថា មុនពេលកើតហេតុ បុរសរងគ្រោះបានចេញពីផ្ទះដោយជិះម៉ូតូម៉ាក អាយខន ពណ៌ត្រួយចេក ពាក់ស្លាកលេខ ភ្នំពេញ 1AD-8292 មួយគ្រឿងជិះក្នុងទិសដៅពីកើតទៅលិច តាមបណ្តោយផ្លូវលេខ ៤៣២ ខណៈមកដល់ចំណុចកើតហេតុខាងលើ ស្រាប់តែមានរថយន្តម៉ាកហាយឡែនឌ័រ មួយគ្រឿងពាក់ស្លាកលេខ2AN-4453 បានបើកបរក្នុងទិសដៅពីជើងទៅត្បូង មកបុកម៉ូតូខាងលើពេញទំហឹងបណ្តាលឲ្យដួល ហើយជនរងគ្រោះខ្ទាតចេញទៅឆ្ងាយ ចំណែកឯម៉ូតូខ្ទាតទៅចូលក្រោមរថយន្តមួយគ្រឿងទៀតបណ្ដោលឲ្យរងការខូចខាតយ៉ាងដំណំ ហើយម្ចាស់រថយន្តបង្កមិនព្រមឈប់ទេ បើករត់គេចខ្លួនបាត់ស្រមោល បន្សល់ទុកស្លាកលេខមួយបន្ទះនៅនឹងកន្លែងកើតហេតុ។
ក្រោយពេលកើតហេតុ បុរសជាជនរងគ្រោះត្រូវបានក្រុមគ្រួសារបញ្ជូនយកទៅព្យាបាលនៅឯមន្ទីរពេទ្យ ចំណែកឯម៉ូតូរបស់ជនរងគ្រោះ និងស្លាកលេខដែលមានលេខរបស់រថយន្តបង្ក ត្រូវបានយកទៅរក្សាទុកនៅអធិការដ្ឋាននគរបាលខណ្ឌចំការមន ដើម្បីស្រាវជ្រាវរកម្ចាស់រថយន្តខាងលើមកដោះស្រាយគ្នាជាបន្ត៕ ស រស្មី
