សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ វាស្ទើរតែក្លាយជារឿងធម្មតាទៅហើយ ដែលកន្លែងម៉ាស្សា កោសជប់ភាគច្រើននៅតាមបណ្តោយផ្លូវ២០០៤ ពេលភ្ញៀវចូលម៉ាស្សាម្តងៗ តែងតែបាត់លុយកាក់ ហើយមកប្តឹងសមត្ថកិច្ចបានត្រឹមតែចាប់បញ្ជូន ពេលខ្លះបានលុយពាក់កណ្តាលមកវិញ ។
ជាក់ស្តែងកាលពីម៉ោង៩យប់ ថ្ងៃទី២៥ ខែវិច្ឆិកា ឆ្នាំ២០១៧ បុរសម្នាក់មកដាក់ពាក្យបណ្តឹងនៅប៉ុស្តិ៍ កាកាប១ អោយសមត្ថកិច្ចជួយអន្តរាគមន៍រឿងបាត់លុយចំនួន៣០០ដុល្លារ ពេលដែលរូបគាត់ចូលទៅម៉ាស្សាក្នុងហាងម៉ាស្សាមួយកន្លែងគ្មានស្លាកយីហោ ស្ថិតតាមបណ្តោយផ្លូវ ២០០៤ សង្កាត់កាកាប១ ខណ្ឌពោធិ៍សែនជ័យ ហើយភ្លាមៗនោះសមត្ថកិច្ចក៏បានឃាត់ខ្លួនស្ត្រី២នាក់យកមកសាកសួរផងដែរ ។
បុរសរងគ្រោះឈ្មោះ ប៉ុល ច័ន្ទតារា អាយុ៣៦ឆ្នាំ មុខរបរលក់ដូរ ស្នាក់នៅភូមិទូកមាស ឃុំទូកមាសខាងលិចស្រុកមន្ទាយមាស ខេត្តកំពត ចំណែកស្ត្រីសង្ស័យ ១-ឈ្មោះ ស កូឡាប អាយុ២០ឆ្នាំ មុខរបរអ្នកម៉ាស្សា ស្នាក់នៅភូមិត្រពាំល្វា១ សង្កាត់កាកាប១ ខណ្ឌពោធិ៍សែនជ័យ ២-ឈ្មោះ ហេង ធូ អាយុ៣០ឆ្នាំ មុខរបរអ្នកម៉ាស្សា ស្នាក់នៅភូមិត្រពាំល្វា១ សង្កាត់កាកាប១ ខណ្ឌពោធិ៍សែនជ័យ។
បើតាមពាក្យបណ្តឹងបុរសរងគ្រោះបញ្ជាក់ថា កាលពីថ្ងៃទី២៥ វេលាម៉ោង៨យប់ រូបគាត់ជិះម៉ូតូជាមួយមិត្តភក្តិចេញពីចោមចៅទៅជួបមិត្តម្នាក់ទៀត ប៉ុន្តែដោយគាត់មិនសូវស្រួលខ្លួន ក៏ចូលទៅម៉ាស្សា តែគាត់ចូលតែម្នាក់ឯងទេ ។ ពេលចូលទៅដល់ផ្ទះម៉ាស្សាកោសជប់ស្ត្រីម្នាក់ឲ្យគាត់ចូលបន្ទប់នៅជាន់ទី១ ហើយគាត់ក៏ដោះអាវដាក់ព្យួរនៅមាត់បង្អួច ខណៈនោះស្ត្រីកោសជប់បានហុចកន្សែងពោះគោឲ្យគាត់ស្លៀកឡើងដេកលើគ្រែ ដើម្បីម៉ាស្សា។ មួយសន្ទុះធំមក ស្ត្រីនោះប្រាប់ថា «ចប់ហើយ» រួចក៏ចុះមកក្រោមបាត់ ហើយគាត់បានលូកមើលលុយក្នុងហោប៉ៅខោ ស្រាប់តែបាត់លុយអស់៣០០ដុល្លាររលីង ភ្លាមៗគាត់ឡូឡា និងឲ្យយកលុយឲ្យគាត់វិញ តែកន្លែងម៉ាស្សានោះប្រកែក ទើបគាត់សម្រេចចិត្តមកប្តឹងនគរបាលប៉ុស្តិ៍ ដើម្បីជួយរកខុសត្រូវ ។
ក្រោយពីទទួលពាក្យបណ្តឹងភ្លាម សមត្ថកិច្ចបានទៅអញ្ជើញម្ចាស់ហាងមកកាន់ប៉ុស្តិ៍ ដើម្បីឆ្លើយបំភ្លឺ ក្នុងនោះផងដែរស្ត្រីម្នាក់ឈ្មោះ ស កូឡា សារភាពថា លុយរបស់ភ្ញៀវខាងលើ គឺស្ត្រីឈ្មោះ ហេង ធូ ជាអ្នកលួចយករបស់ភ្ញៀវ ប៉ុន្តែពេលសមត្ថកិច្ចសាកសួរស្ត្រី ហេង ធូ នេះ មិនបានសារភាពឡើយ ។ សមត្ថកិច្ចបន្តថា ស្ត្រី ហេង ធូ នេះ ត្រូវសមត្ថកិច្ចចាប់ឡើងភ្លេចទៅហើយរឿងដដែលៗនេះ និងកសាងសំណុំរឿងទៅសាលាដំបូង៣ដងមកហើយ ប៉ុន្តែមិនដែលជាប់បានយូរឡើយ ។
បច្ចុប្បន្នស្ត្រីទាំង២នាក់ត្រូវឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌពោធិ៍សែនជ័យ ៕ សុខាសែនជ័យ
