សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ ប្រជាពលរដ្ឋមានការភ្ញាក់ផ្អើលយ៉ាងខ្លាំង ចោមរោមមើលយ៉ាងច្រើនកកកុញ និងក្រុមគ្រួសារតក់ស្លុតយ៉ាងខ្លាំងខណះប្រទះឃើញសាកសពកូនប្រុស ស្លាប់ដោយលង់ទឹកប្រឡាយមុខផ្ទះកាលពីរសៀលម៉ោង៥ថ្ងៃព្រហស្បតិ៍ ៤រោច ខែមិគសិរ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៧ ខែធ្នូឆ្នាំ២០១៧ នៅភូមិសំរោង ឃំុគ្រួស ស្រុកស្វាយជ្រំ ខេត្តស្វាយរៀង ។
យោងតាមសមត្ថកិច្ចនគរបាលខេត្តស្វាយរៀងបានឲ្យដឹងថា ក្រោយពីទទួលព័ត៌មានពីប្រជាពលរដ្ឋថា មានក្មេងស្លាប់នៅទឹកស្រះ ទើបកម្លាំងនគរបាលខេត្ត សហការជាមួយនគរបាលជំនាញ និងនគរបាលស្រុកបានចុះមកដល់កន្លែងកើតហេតុ។
សមត្ថកិច្ចនគរបាលបានឲ្យដឹងថា ក្មេងដែលស្លាប់មានឈ្មោះ រិន ក្រូច មានអាយុ៣ឆ្នាំ រស់នៅភូមិសំរោង ឃុំគ្រួស ស្រុកស្វាយជ្រំ។ ។
តាមឪពុកបានរៀបរាប់ទាំងទឹកភ្នែកថា មុនកើតហេតុគាត់បានជាប់រវល់កាប់ដីដាក់រោងគោ ចំណែកប្រពន្ធជាប់មើលកូនខ្ចីនៅខាងក្នុងផ្ទះ ប្រមាណជាកន្លះម៉ោងបាត់សម្លេងកូនប្រុស ក៏មានការសង្ស័យដើររក និងស្រែកហៅស្រាប់តែប្រទះឃើញលង់ទឹកប្រឡាយបាត់ទៅហើយ។
ក្រោយពីសមត្ថកិច្ចពិនិត្យសាកសពរួចមិនឃើញមានស្លាកស្នាមកត់សម្គាល់នោះទេ ពិតជាបានស្លាប់ដោយរអិលជើងលង់ទឹកប្រឡាយពិតប្រាកដមែន ក៏ប្រគល់ទៅឲ្យក្រុមគ្រួសារយកធ្វើបុណ្យតាមប្រពៃណីទាំងក្ដុកក្ដួលបំផុត ៕ យឹម សុថាន
