សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ និស្សិតស្រីម្នាក់បានរងរបួសធ្ងន់ធ្ងរ បណ្ដាលមកពីករណីគ្រោះថ្នាក់ចរាចរណ៍គួរឲ្យរន្ធត់រវាងរថយន្ត និងម៉ូតូបុកគ្នាពេញទំហឹងលាន់សូរដូចរន្ទះបាញ់កាលពីវេលាម៉ោង៤រសៀល ថ្ងៃសុក្រ ៥រោច ខែមិគសិរ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៨ ខែធ្នូ ឆ្នាំ២០១៧ លើផ្លូវជាតិលេខ១ ចន្លោះគីឡូម៉ែត្រលេខ ១២១ លេខ១២២ ស្ថិតក្នុងភូមិ ស្វាយ សង្កាត់ចេក ក្រុងស្វាយរៀង ខេត្តស្វាយរៀង។
យោងតាមសមត្ថកិច្ចនគរបាលក្រុងស្វាយរៀងបានប្រាប់នគរវត្តថា និស្សិតស្រីដែលរងរបួសមានឈ្មោះ ផូ កញ្ញាពេជ្រ អាយុ១៩ឆ្នាំ មុខរបរជានិស្សិត រស់នៅភូមិ ចំបក់ សង្កាត់ ចេក ក្រុង ស្វាយរៀង ខេត្ត ស្វាយរៀង ខណៈជិះម៉ូតូម៉ាកស៊ុយសូគី Nex ពណ៌ ស គ្មានស្លាកលេខ ខូចខាតយ៉ាងដំណំ។
ចំណែកអ្នកបើកបរបង្កហេតុមានឈ្មោះ ហែម ថាន អាយុ ៤១ ឆ្នាំ មុខរបរ ជាងសំណង់ រស់នៅភូមិ ឫស្សីជង្រុក ឃុំ រមាំងថ្កោល ស្រុក ស្វាយទាប ខេត្ត ស្វាយរៀងត្រូវបានសមត្ថកិច្ចឃាត់ខ្លួនមកសាកសួរភ្លាមៗនៅអធិការនគរបាលក្រុងស្វាយរៀង។
តាមសាក្សីបានប្រាប់ថា មុនកើតហេតុមានរថយន្ដម៉ាក តូយ៉ូតា កាមរី ពណ៌ ទឹកមាស ពាក់ស្លាកលេខ ភ្នំពេញ ២W ២៩៧៩ បើកបរដោយបុរសម្នាក់លើផ្លូវជាតិលេខ១ក្នុងទិសដៅពីកើតទៅលិច យ៉ាងលឿន ខណៈនោះស្រាប់តែមានម៉ូតូម៉ាក Nex ពណ៌ ស គ្មានស្លាកលេខ បើកបរស្ត្រីម្នាក់ជិះពីលិចទៅកើតបញ្រស់់គ្នា ក៏បុកពេញទំហឹងលាន់សូរដូចរន្ទះ បង្កឲ្យមានការភ្ញាក់ផ្អើលដល់ប្រជាពលរដ្ឋតែម្ដង។
បន្ទាប់មក សមត្ថកិច្ចបានមកដល់វាស់វែង និងយកអ្នករងគ្រោះមកព្យាបាលនៅមន្ទីរពេទ្យខេត្តស្វាយរៀង និងអូសមធ្យោបាយ ទាំង២គ្រឿងរក្សាទុកនៅការិយាល័យចរាចរណ៍ខេត្តស្វាយរៀងដើម្បីដោះស្រាយតាមច្បាប់ ។
សមត្ថកិច្ចបញ្ជាក់ថា មូលហេតុ៖ មកពីរថយន្ដមិនប្រកាន់ស្ដាំ ទើបជួបករណីខាងលើនេះកើតឡើងបែបនេះ៕ យឹម សុថាន
