មេធាវីទំនើង អ៊ិត ពិសិដ្ឋរង្ស៊ី ប្រឈមបទល្មើសឧក្រិដ្ឋ , វប្បធម៌និទណ្ឌភាព គួរបញ្ឈប់ ខណៈបាត់សីលធម៍ជាអ្នកច្បាប់និងវិជ្ជាជីវៈជាមេធាវី

ចែករំលែក៖

ភ្នំពេញ៖ មេធាវី អ៊ិត ពិសិដ្ឋរង្ស៊ី អត្តលេខ៩៩១ ត្រូវបានឃាត់ខ្លួនផ្លូវការហើយ ក្រោយបាញ់យុវជនម្នាក់ឱ្យរបួសនិងគំរាមបាញ់យុវជនម្នាក់ទៀត ដែលជាការគំរាមកំហែងអាយុជីវិត។ អំពើល្មើសនេះ ទំនងកើតចេញពីភាពស្រវឹង និង ចរិតក្រអឺតក្រទម កោងកាច ដែលមិត្តភក្តិជនសង្ស័យលួចបង្ហើបប្រាប់ ។ មជ្ឈដ្ឋានមួយចំនួន សង្ឃឹមថា វប្បធម៌និទណ្ឌភាពឬភាពគ្មានទោសចំពោះជនល្មើសដែលប្រព្រឹត្ត គួរបញ្ឈប់ ដើម្បីពង្រឹងការអនុវត្តច្បាប់នៅកម្ពុជា ។

លោក នេត ស៊ីថុន អធិការនគរបាលខណ្ឌ៧មករា និយាយថា ពេលនេះសមត្ថកិច្ចកំពុងចាត់ការបន្តតាមនីតិវិធី ហើយនឹងបញ្ជូនជនសង្ស័យ ទៅអយ្យការអមសាលាដំបូងរាជធានីភ្នំពេញ ដើម្បីចាត់ការតាមច្បាប់ ។ នគរបាលសន្និដ្ឋានថា ជនសង្ស័យ អ៊ិត ពិសិដ្ឋរង្ស៊ី បានប្រព្រឹត្តបទល្មើស”ហិង្សាដោយចេតនាមានស្ថានទម្ងន់ទោស និង ប្រើប្រាស់អាវុធដោយគ្មានការអនុញ្ញាត” ។

ហេតុការណ៍បាញ់យ៉ាងគន្លើននេះ កើតឡើងកាលពីវេលាម៉ោង២២៖៣០ ថ្ងៃទី១៨ ខែធ្នូ នៅជិតភូមិគ្រឹះនាយឧត្តមសេនីយ៍ នេត សាវឿន អគ្គស្នងការនគរបាលជាតិ ផ្លូវលេខ២១១កែងផ្លូវលេខ២១៧ ភូមិ៧ សង្កាត់វាលវង់ ខណ្ឌ៧មករា ។

ក្រោយហេតុការណ៍បាញ់នេះ ជនរងគ្រោះពីរនាក់ជានិស្សិតសាលាច្បាប់ បានដាក់ពាក្យបណ្តឹងប្តឹងជនសង្ស័យ អ៊ិត ពិសិដ្ឋរង្ស៊ី ដែលធ្វើឱ្យពួកគេរបួស និង រងការគំរាមកំហែងដល់អាយុជីវិត ។

របាយការណ៍នគរបាល បង្ហាញថា ជនសង្ស័យចេញពីហូបការគេនៅវិមានចរណៃ រួចជួបជុំមិត្តភក្តិហូបបន្តនៅចំណុចកើតហេតុ ។ ពេលហូបនោះ មានការទាស់សម្តីគ្នា ទើបជនសង្ស័យចូលក្នុងរថយន្ត យកកាំភ្លើងម៉ាកទំនើបបាញ់ជនរងគ្រោះឈ្មោះ លី តុលា បណ្តាលឱ្យរបួសជើងខាងស្តាំនិងបន្តយកកាំភ្លើងភ្ជង់គំរាមជនរងគ្រោះម្នាក់ទៀតឈ្មោះ ខុន បញ្ញាសិទ្ធិ ។

អ្វីជាការកត់សម្គាល់ គឺ នៅពេលសមត្ថកិច្ចចុះដល់កន្លែងកើតហេតុ មេធាវី អ៊ិត ពិសិដ្ឋរង្ស៊ី បោះពាក្យសម្តីយ៉ាងព្រហើនថា “គេចង់បាញ់ប៉ុន្មានគ្រាប់ទៀត ក៏គ្មានបញ្ហាដែរ “។

ការប្រព្រឹត្តរបស់មេធាវី អ៊ិត ពិសិដ្ឋរង្ស៊ី បានប៉ះពាល់យ៉ាងខ្លាំងក្លាដល់វិជ្ជាជីវៈមេធាវី តែទោះបីយ៉ាងណា នៅថ្ងៃទី១៩ ខែធ្នូ នៅពុំទាន់អាចសុំការបញ្ជាក់ពីលោកមេធាវី យឹម សារី អ្នកនាំពាក្យគណៈមេធាវី បានទេ ដោយសារទូរស័ព្ទចូលគ្មានអ្នកទទួល ។

រាជរដ្ឋាភិបាលកម្ពុជា ខិតខំយ៉ាងខ្លាំងចំពោះការគ្រប់គ្រងអាវុធជាតិផ្ទុះ ។ ប៉ុន្តែដោយសារជនឱកាសនិយមមួយចំនួន តែងតែឆ្លៀតយកតួនាទីប្រព្រឹត្តបទល្មើស ពិសេសការបាញ់បោះសេរី ដែលបង្កភាពអសន្តិសុខក្នុងសង្គម។ មជ្ឈដ្ឋានជាច្រើន សង្ឃឹមថា ស្ថាប័នមានសមត្ថកិច្ច ពិសេសតុលាការអនុវត្តច្បាប់ដោយត្រឹមត្រូវ ពុំត្រូវរងសម្ពាធណាមួយឡើយ បើទោះជាមានលេចឮថា កំពុងមានអ្នករត់ការខ្វែងដៃ ខ្វែងជើងក៏ដោយ។
នគរបាលខណ្ឌ៧មករា បានអោយដឹងថា៖ មេធាវីទំនើងខាងលើនឹងបញ្ជូនទៅកាន់អយ្យការបន្តនៅវេលាម៉ោង៨និង៣០នាទីព្រឹកថ្ងៃទី២០ ខែធ្នូ ឆ្នាំ២០១៧ ៕ ចេស្តា