សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ហេតុការណ៍ភ្ញាក់ផ្អើលមួយ បានកើតឡើងបន្ទាប់ពីសមត្ថកិច្ចមូលដ្ឋានចុះទៅឃាត់បុរសម្នាក់ស្រវឹងស្រាជោកជាំ ហៅឡូឡានិងបោក តុ កៅអី ខូចខាតខ្ទេចនិងបានយកដុំថ្មគប់បងថ្លៃរបស់ខ្លួនបណ្ដាលឲ្យរងរបួសដៃ កាលពីវេលាម៉ោង០៣ទៀបភ្លឺ ថ្ងៃអង្គារ ១រោច ខែបុស្ស ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី២ ខែមករា ឆ្នាំ២០១៨ តាមបណ្ដោយផ្លូវព្រះស៊ីសុវត្ថិនៅចំណុចផ្សារមុខរាត្រី ស្ថិតនៅក្នុងសង្កាត់វត្តភ្នំ ខណ្ឌដូនពេញ ។
បុរសរងគ្រោះឈ្មោះ ម៉ាប មាន អាយុ៣៦ឆ្នាំ មុខរបរលក់ដូរ ស្នាក់នៅផ្ទះជួលម្តុំជ្រោយចង្វារ ខណ្ឌជ្រោយចង្វារ ។
យោងតាមសម្តីបុរសរងគ្រោះ បានឲ្យដឹងថា មុនពេលកើតហេតុ គាត់កំពុងលក់ដូរជាមួយប្រពន្ធសុខៗ ស្រាប់តែនៅម៉ោងកើតហេតុប្អូនថ្លៃរបស់គាត់មិនដឹងជិះម៉ូតូមកពីណា ទាំងស្រវឹងស្រាជោកជាំមកដល់មិនដឹងមានរឿងអ្វី បានយកកៅអី និងតុ បោកទាំងកំរោលបណ្ដាលឲ្យរងការខូចខាត មិនតែ ប៉ុន្តែថែមទាំងយកដុំថ្មគប់ទៅលើគាត់ បណ្តាលឲ្យត្រូវចំដៃឆ្វេង បង្កការភ្ញាក់ផ្អើលដល់សមត្ថកិច្ចមូលដ្ឋានជួយមកអន្តរាគមន៍ ដោយឃាត់ប្អូនថ្លៃមិនឲ្យស្រែកឡូឡា និងបង្ករឿងទៀត ។
បន្ទាប់ពីសមត្ថកិច្ចចុះទៅដល់កន្លែងកើតហេតុ ភ្លាមនោះ ប្អូនថ្លៃ(ដែលជាជនបង្កហេតុ) បានរៀបរាប់ទាំងស្រវឹងថា រូបគេខឹងបងស្រីរបស់ខ្លួន ដោយទូរស័ព្ទមកជាច្រើនដងច្រើនសារតែមិនលើក ដោយសារចង់ប្រាប់ថា ម្តាយគាត់ឈឺ ហើយក៏ជិះម៉ូតូមកដល់ទីតាំងបងស្រី និងបងថ្លៃលក់តែម្តង ហើយដោយកំហឹងខឹងទូរស័ព្ទអត់លើក ទើបបង្កហិង្សាតែម្តង ។
ក្រោយពេលកើតហេតុសមត្ថកិច្ចមូលដ្ឋាន ចុះមកអន្តរាគមន៍និងសួរនាំទើបដឹងថា ករណីនេះជារឿងឈ្លោះគ្នា បងថ្លៃនិងប្អូន ក៏សម្របសម្រួលគ្នាឲ្យត្រឡប់ទៅផ្ទះវិញ ។ ចំណែកបុរសរងគ្រោះក៏បានទៅព្យាបាលរបួសខ្លួនឯងផងដែរ ៕ ស រស្មី
