រថយន្តធុនធំពីរគ្រឿងបើកកៀរគ្នាបង្កការកកស្ទះនៅចំណុចភ្លើងស្តុបផ្លូវចុះរង្វងមូលផ្សារដើមថ្កូវ

ភ្នំពេញ៖ រថយន្តធុនធំពីរគ្រឿង បានបើកកៀរគ្នាជាប់ រុញទៅប៉ះជាមួយរថយន្តបាឡែន ដែលកំពុងចតនៅចញ្ចើមផ្លូវ២១៧ នៅចំណុចភ្លើងស្តុប ផ្លូវចុះរង្វង់មូលផ្សារដើមថ្កូវ បណ្តាល ឲ្យមានការកកស្ទះយ៉ាងខ្លាំង។ ហេតុការណ៍បង្កកាភ្ញាក់ផ្អើលនេះកើតឡើងកាលពីវេលាម៉ោង១រសៀល ថ្ងៃសុក្រ ៣កើត ខែមាឃ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី១៩ ខែមករា ឆ្នាំ២០១៨ ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។

សាក្សីថា បុរសម្នាក់បើករថយន្តបាញ់ស៊ីម៉ង់តិ៍ ពណ៌ស ពាក់ស្លាកលេខ ភ្នំពេញ 5A-0957 និង ​​រថយន្តក្រឡុកស៊ីម៉ង់តិ៍ ពាក់ស្លាកលេខ ភ្នំពេញ 5A-1539 រថយន្តទាំងពីរបានធ្វើដំណើរស្របទិសគ្នា ពេលមកដល់ចំណុចកើតហេតុ រថយន្តបាញ់ស៊ីម៉ង់តិ៍ ស៊ីញូបម្រុងបទស្តាំ ក៏ស្រាប់តែមាន​​រថយន្តក្រឡុកស៊ីម៉ង់តិ៍ ​​ ជែងខាងស្តាំរថយន្តបាញ់ស៊ីម៉ង់ត៍ បណ្តាលឲ្យកៀរគ្នាគៀបជាប់ និងរុញទៅប៉ះជាមួយនឹងរថយន្តបាឡែន ពណ៌ទឹកប្រាក់ ពាក់ស្លាកលេខ ភ្នំពេញ 2T-7264 មួយគ្រឿង ដែលកំពុងចតចោលនៅចិញ្ចើមផ្លូវ រងការខូចខាតផ្នែកខាងឆ្វេង ​បង្កការកកស្ទះពេញផ្លូវផងដែរ។

ក្រោយកើតហេតុ សមត្ថកិច្ចមូលដ្នានចុះអន្តរាគមន៍រួចយករថយន្តទាំងពីរចេញពីផ្លូវដើម្បីរំដោះការកកស្ទះ និងឲ្យភាគីទាំងសងខាងដោះស្រាយគ្នានៅពេលក្រោយ៕ ស រស្មី